“Маргааш л дайнд явчих юм шиг 1080 хоног минь” гэж До.Цэнджавын баримтат тууж байдаг. Маш үнэн бичигдсэн. Нэн тод. МАН маргааш л хөгжүүлчих юм шиг “Хөгжлийн хөтөлбөр” хэмээх сүржин уриат сонгуулийн мөрийн хөтөлбөр дэвшүүлэн ялаад эдүгээ 1078 хоножээ.
Одоо амласан амлалтаа эрх баригчид ард түмэнтэйгээ эргэн харж ширхэг зүйлчлэл бүрээр биелэлтээ тооцох хэрэгтэй нь нэгэнт болжээ. Намар гэнэт сонгууль хийчихгүй л бол сонгууль товт хугацаандаа болоход ердөө 378 хоног үлдсэн байна. Одоо МАН-ынхан энэ гурван зуун наян хоногт юу хийх, юу амжуулж чадахаа ард түмэндээ тодорхой хэлэх хэрэгтэй. Учир юун хэмээвээс, Хөгжлийн хөтөлбөр хэмээх ариун үзэл санаат аугаа баримт бичгээс хүүхдийн сургууль, цэцэрлэг барьсан зэрэг ганц нэгхэн амлалт тал хувьтайг эс тооцвол хэрэгжсэн зүйлээр үнэмлэхүй тааруу байна. Хэрэгжээгүй, нэг үгээр хэлбэл амлалт нь агаарт замхран байна.
Нүүрсний дөчин дөрвөн их наядын хулгайтай тэмцэж байгаа, эрх баригчид. Парламентын нийт суудлын ерэн хувьтай асар том хүч углуургатай атлаа, одоо хүртэл нүүрсний асуудлыг тунгаан хэлэлцэх Түр хорооны сонсголоо явуулж чадахгүй байна. Үүнээс үзэхэд энэ их том бяр, үлэг гүрвэлийн эрх мэдэл энэ намыг нэн тааруу харагдуулж, ард иргэдийн итгэлийг авах боломжийг доройтуулан сулруулсаар. Амлалт бүхнээ эс биелүүлнэ.
Хамгийн сүүлчийн жишээг хэлэхэд, олон улстай хамт алхана, хүйсийн тэгш эрхийг үнэмлэхүй хуульчилна гэсэн наяад оныхоо дарга нарын эсрэг кнопыг өчигдөр бүлгийн дарга Д.Тогтохсүрэн, Төрийн байгуулалтын байнгын хороон дарга Н.Энхболд, Харвардын коммунист Ц.Мөнх-Оргил нар дарж байна. Сарын өмнө л генсек, Засгийн хэрэг эрхлэхийн Д.Амарбаясгалан нь амлалт өгөөд, жендерээ жигдрүүлнэ гээд байхад л өчигдөр эдгээр ах нар эсрэг дарж байна.
Үүнийг хэрхэн үзэх вэ. Ард түмний уур бухимдал дээд цэгтээ хүрч, эдгээр түшээдийн увайгүй овлигогүй бүхэнд ундууцаад байхад л , шарханд давс асгахын үлгэрээр хандаж байгаа УИХ-ын гишүүнээр зургаан удаагаас хоёр удаа хүртэл ажиллаж байгаа эдгээр эрхмүүдийг үнэхээр юу гэж, хэрхэн ойлгох ухааныг хайгаад эс олно. Энэ намын удирдлагууд эдгээр хүмүүсээрээ Монголын эмэгтэйчүүдээс уучлал гуйлгах хэрэгтэй. Нийгмийн нийт олонхийн тавин нэгэн хувийг үгүйсгэснийх нь төлөө. Бүх цагийн үеийн турш ард түмний татварын мөнгөөр туйлж, төрийн дээр зайдлахдаа яг л ийм тохуут, даажинт, дээрэлхэлт агуулгаар энэ улс орныг унаж иржээ.
Сарын өмнөх ярьсаныг ингэж жадлан эсэргүүцэж байгаа хүмүүсээс сайны хэт, саруулын гялаан харах ямар ч боломж алга. Монголын ард түмэн одоо МАН-ын мөрийн хөтөлбөрийг мөч бүрээр нь, навч нахиагаар нь ишлэн хэлэлцэж, эрх баригчдаас хариуцлага нэхэж, амлалтыг нь сануулан, биелүүлүүлэх ажлыг иргэн бүрээр идэвхжин хийх ёстой. Хөрөнгө оруулалт таг. Юу ч байхгүй. Эдийн засгийн хөгжлийн сайд Ч. Хүрэлбаатар нь үдэш уушын газарт хөрөнгө оруулалт ярьж байна гэх түвшинний уланд очсон. Дөнгөж амь орж байгаа эдийн засгаа эргээд л капиталгүй халамжийн зам руу урсгах шийдвэрүүдээ гаргаад эхэлсэн.
Эдийн засгийн төрөлжил, экспортын нэмэгдэл ер байхгүй. Зэс нүүрс зарсан жаахан мөнгөөрөө л амь зогоонхон байна шүү дээ. Монголын ард түмэн хариуцлагатай бай аа. Амлат өгч, алтан цэцэг чихэн дээр тань ургуулсан “ухаант”түшээдээсээ хийсэн, амласаныг нь асууж, хариуцлага тооцох иргэний үүргүүдээ биелүүлээч ээ. Манай улс өнөөдөр хээл хахуулийн агуулгаар дэлхийд цуурайтаж, ардчиллын индексээр ухарсанаараа л гайхуулдаггүй юм бол бах төрөх зүйл тун бага шааригдаж байна шүү дээ. Ямар ард түмэн байна, тийм төр оршино гэж үг бий. Юу ч бичиж болох цагаан цаас ч гэж үг бас байх. Монголын ард түмэнд эдгээр тодорхойлолт таарахгүй, зохихгүй. Монголын ард түмэнд итгэл, зориг, үнэнд ялах ухаан бий.
Тун саяхан гэхэд, эрэгтэй дөрөв, эмэгтэй дөрөв, залуус, дэлхийн тооно Эвэрестэд багаараа анх гарчихаад ирлээ шүү дээ. Ингэж чадаж байгаа ард түмэн эх орноо зөв удирдах хүмүүсийг сонгож чадах нь эргэлзэмгүй. Амлалтыг нэх, ард түмээн!
Б. БАЯРАА
Amlalt.mn
