Засгийн газрын Хэрэг эрхлэх газрын дарга Д.Амарбаясгалан хэлнэ билээ. Ерөнхий сайдын урд хөршид хийх айлчлалын тов гараагүй ч, бэлтгэл ажил хангагдаж байгаа, тэр тусмаа нилээд ач холбогдолтой айлчлал болно гэж мэдээллээ.
Айлчлалын хөтөлбөр дотор төмөр замын холболтын цэгийг эцэслэн тогтоох ажил гол чухал үзүүлэлт байх төлөвтэй. Зам тээврийн сайд С.Бямбацогт ч эл чиглэлд ажиллаж, өмнөд хөршид айлчлан, тус улсын эл зам тээврийн асуудлыг эрхэлсэн сайдтай уулзаж, айлчлалын урьдач нөхцөл бололцоог бүрдүүлэхээр ажилласнаар ойлгогдсон мэдээллүүд гарав.
Төмөр замын холболт бол нэн чухал асуудал. Энэ холболт хэдий чинээ түргэн шуурхай хэрэгжиж, бодит биелэл болнов, мөн хэрээр манай эдийн засагт асар чухал нөлөөтэй нь ойлгомжтой. Д.Амарбаясгалангийн мэдээлсэнээр, уул уурхайн бүтээгдэхүүний биет хэмжээг тохирох асуудлыг мөн урьд хөршид хийх айлчлалын үеэр ярьж хэлэлцэх нь чухал байх нь. Энэ ойлгомжтой.
Уул уурхайн эдийн засаг голлосон орон, нөгөөтэйгүүр гол түшиц эдийн засагт орон урьд хөрштэйгээ энэ асуудлаар бодит тодорхой хэлцлийг хийж, сайн үр дүнд хүрэх нь онцгой эрх ашиг. Эдгээр нь айлчлалын улс төр, эдийн засгийн үр дүн авчирах хүлээлтийг нийгэмд бий болгож байгаа нь нууцгүй. Хэрэг эрхлэхийн дарга мөн хэлсэн. Нүүрсний экспортод хүндрэл учраагүй. Өдөртөө 1000 гаруй машин нүүрс тээвэрлэн экспортлож байгаа.
Өмнөх оны сүүл саруудад 160 мянган тонныг экспортлон гаргаж байсан бол эдүгээ 230 мянган тонн орчимд байгааг дуулгасан. Нүүрсний дөчин их наядын хулгай, далд эдийн засгийн алив бусармаг явдлуудыг хумиад ирэхээр эдийн засагт нааштай үр дүнгүүд гарсаар байна. Сая төсөвт тодотгол хийж, тэтгэвэрийг нэмэх, хүүхдийн мөнгийг олгох шийдвэрийг Засгийн газар шийтгүүлэн хуульчлав.
Юмны үнэ өсөж, иргэдийн амьжиргаанд амаргүй нөхцөл байдал үргэлжилсэн энэ цагт эдийн засгийн нааштай сэргэлт, Засгийн газраас авч хэрэгжүүлж байгаа эдгээр арга ажиллагаанууд зохих хэмжээнд эерэг уур амьсгал бүрдүүлж байгааг тэмдэглэлтэй. Засгийн газраас “5 Ш” ажиллагааг эрчимжүүлсээр.
Юутай ч, далд эдийн засаг, хээл хахууль, шамшигдууллын замаар явдаг байсан мөнгөний урсгалууд хяналтад орж, улс маань эрсдэлгүй явах зам дээр гарч ирэв бололтой. Одоо хөрөнгө оруулалтыг эрчимтэй татаж, эдийн засгаа тэлж, солонгоруулах ажлыг бүх талаар хийх нь дамжиггүй. Х.Нямбаатар сайдаар ахлуулан, ураны чиглэлээрх шинэ дэвшилт шийдвэрүүд, хэлэлцээр гадаад талд сайн мэдээ болох нь мэдээж.
Удахгүй 07 сарын 01-ний өдрөөс өмнө нүүрсний хэлэлцүүлэг сонсгол болохоор болсон гэдгийг УИХ-ын гишүүн С.Ганбаатар мэдээллээ.
Энэ сонсголыг мөн л Х.Нямбаатар ахлан, нүүрсний асуудлаархи хэлэлцүүлэг өрнүүлэх нь тодорхой болж байх шиг байна.
Х.Нямбаатар сайд, нүүрсний асуудлыг нэг мөр шийдэн, наадмаас өмнө ард түмэндээ мэдээлэх нь аль ч талаасаа онцгой чухал байна. Ард түмний, шударга ёсны хүлээлтэд энэ сонсголын хариу чухал үр дүн үзүүлнэ.
Б.БАЯР
Амлалт.мн
