“Шинэ тэнгэр газар” гэх шашны урсгалын үйл ажиллагааны талаар өнөөдөр /2025.11.04/ хохирсон иргэний хүүхдүүд хэвлэлийн бага хурал хийж, мэдээлэл өглөө.
Тодруулбал Солонгосын “Шинэ тэнгэр газар” гэх нэртэй шашны урсгал манай улсад “Монгол Сувд” сүм нэртэйгээр үйл ажиллагаа явуулж байгаа талаар хэлэв.
Тэд шашны энэхүү урсгалаас болж ээжийгээ алдсан бөгөөд гэр бүлийн харилцаанд хэрхэн сөрөг нөлөө үзүүлсэн талаар доорх тайлбарыг өгч, хууль хяналтын байгууллага тус шашны байгууллагын үйл ажиллагааг шалгах хэрэгтэйг хэллээ.
Хохирогчийн хүү:Манай ээж энэ сүмд 2024 оны нэгдүгээр сараас эхэлж явсан. Эхлээд сэтгэл зүйн сургалтад явж байна гэж тайлбарладаг байсан. Настай хүн учраас бид зөвшөөрсөн. Тэгээд сүм үү гэхээр “Сургалтын төв” гэж тайлбарладаг байсан. Нийгэмд сайн үйлсийн ажил, буян хийдэг гэдэг байсан. Гэтэл ээж маань намайг энэ сүмдээ явахыг шаардаж эхэлсэн. Чи явбал дүү нар чинь явна гээд шахаж эхэлсэн. Сүүлдээ зан ааш нь эвдрээд намайг “Чи Сатаны сүнстэй учраас ирэхгүй байна. Сатаны сүнс” гэж хүүхдүүдээ харааж эхэлсэн. “Би мөнх насална,” гэж явсаар энэ жилийн 9 дүгээр сарын 16-ны өдөр тус сүм дээрээ бурхан болсон.
49 хоног нь өчигдөр дууссан. Ийм байдалтай ээжийгээ алдсандаа маш их харамсаж байгаа. Тиймээс энэ муухай урсгалыг болиулах үүднээс энэ мэдээллийг хийж байна. Цаашдаа олон хүн битгий хохироосой гэж хүсэж байна.
Хохирогчийн охин “Энэ шашны урсгал нь Солонгос улсад “Шинэ тэнгэр газар” нэртэйгээр үйл ажиллагаа явуулдаг, үүсгэн байгуулсан хүн нь И Ман Хи гэдэг Солонгос хүн байгаа. Монгол улсад “Монгол Сувд” сүм гэсэн нэртэйгээр үйл ажиллагаа явуулдаг. Солонгос улсад үйл ажиллагаагаа явуулаад 40 жил болж байгаа.
Монгол Улсад үйл ажиллагаа явуулаад 10-аад жил болж байгаа. 51 сая хүн амтай Солонгос улсад 300 мянган итгэгч байдаг. Албан бус мэдээллээр гуравхан сая хүнтэй манай Монгол улсад 12 мянга гаруй хүн явдаг гэсэн.
Энэ газар нь гудамжаар явж байгаа хүмүүсүүдийг онилж эсвэл сүмдээ явдаг итгэгч нарыгаа ургаас нэгийг, төрснөөс нэгийг заавал оруулах ёстой гэж ятгаж хүмүүсээ элсүүлж авдаг.
Гудамжаар явж байгаа хүмүүст хувь хүний хөгжлийн сургалт, сэтгэл зүйн засал, Англи хэл, Солонгос хэлний үнэгүй сургалт, Солонгосын виз гаргалтын үнэгүй зөвлөгөө өгнө гэх мэтээр хуурч элсүүлдэг.
Сургалт маягаар оруулчхаад та нар одоо бид нараас тодорхой хэмжээний мэдээлэл авлаа, библи судлах ёстой гээд библийн номлолоо зааж эхэлдэг.
Өглөө, өдөр, оройн анги зарлаад Библийн хичээлээ зааж, шалгалт авч, Аха тэмцээн хүртэл зохион байгуулдаг. Тэгээд настай хүмүүсийг “Мөнх насална. Та нар үхэхгүй” гэж тархийг нь угаадаг.
Өргөл барьцын хувьд орлогынхоо 10 хувийг хандивла гэж хэлдэг юм билээ. Үүнийгээ шаардахгүй. Гэхдээ “Та нар бурхныг хуурвал бурхан та нарыг хуурна шүү” гэж хэлдэг. Тиймээс бурхандаа үнэнч байж, өргөлөө байнга өгөөрэй гэж шаардаж, ятгадаг.
Дээр дурдсан бүхэн манай ээжийн утсанд ирсэн мессэж, Телеграмм хаягаас нь олж авсан мэдээлэл. Яагаад хүмүүсийг ингэж татан оруулж байна вэ гэвэл цэвэр мөнгө угаадаг газар байна гэж ойлгож байгаа” хэмээн хэлэв.
