Засгийн Газрын өнөөдрийн ээлжит хуралдаанаар Эрүүл мэндийн даатгалын Ерөнхий Газрын даргаар өмнө нь УИХ-ын Тамгын газрын Дэд дарга, Хуулийн газрын ахлах зөвлөхөөр ажиллаж байсан мэргэшсэн төрийн албан хаагчдын нэг Ц.Батбаатарыг томилжээ.
Ц.Батбаатарын хувьд төрийн мерит зарчмын дагуу УИХ-ын Тамгын газарт олон жил үр бүтээлтэй ажиллаж, УИХ-ын Тамгын газрын Дэд дарга хүртэл дэвшин томилогдон ажиллаж байсан, агентлагийн даргаар ажиллах төрийн албаны нөхцөл шаардлагыг бүрэн хангасан нэгэн юм.
Эрүүл мэндийн даатгалын сан хоосорч, үүнээс болж иргэд төлсөн даатгалынхаа үйлчилгээг төрийн болон хувийн хэвшлийн эмнэлгээс авч чадахгүйд хүрч, хэл ам гарах болсон. Ийм хүнд цаг үед ардаа хэн нэгэн дарга албан тушаалтны дэмжлэггүй, зөвхөн мэдлэг чадвар, туршлагаараа шалгарсан Ц.Батбаатарыг төрийн албан хаагчийн мерит зарчмын дагуу ЭМДЕГ-ын даргаар томилж байгааг харахад Ерөнхий сайд Г.Занданшатар аль нэг нам, улс төрийн бүлэглэл, улс төрчдийн захиа даалгавраар захиргааны томилгоог хийхгүй гэдэг нь хэн бүхэнд ойлгомжтой харагдаж байна.
Магадгүй эрүүл мэндийн даатгалын доголдлоос үүдэлтэй иргэдэд хүрэх эрүүл мэндийн тусламж үйлчилгээ тасалдахад хүрсэн цаг үед шударга, зарчимч, ардаа “эзэнгүй” төрийн жинхэнэ албан хаагчаар ЭМДЕГ-ыг удирдуулснаар энэ салбарт үүссэн нөхцөл байдлыг гацаанаас гаргаж чадна гэж Ерөнхий сайд Г.Занданшатар харсан бололтой. Түүний энэ шийдвэр олны талархлыг авч эхэлжээ.
Дашрамд дурдахад өмнө нь ЭМДЕГ-ын даргаар томилогдон ажиллаж байсан Л.Бямбасүрэн, С.Энхболд нь улс төрийн томилгоотой байсан бөгөөд элдэв хэл аманд орооцолдож, салбарын өмнө тулгамдсан асуудлаа шийдвэрлэж чадаагүйгээр үл барим улам асуудалд оруулсан гэх юм билээ.
AMLALT.MN
