Үүтгэгчийг, эх баригчийг үнэн цэнжүүлэх, түүний бодит үрийн чанар дархлааг сайн болгосноор, цул ойлголт, цул үр дүнд хүрдэг нь жам. Энэ үүднээсээ Ерөнхий сайд Л.Оюун-Эрдэнийн боловсрол бүхний дээр, түүний эхний үйл ажиллагаа багшийг дэмжих явдал гэдгээр байндаа зөв тусаж байна. Шүлэг төрүүлж, аялгуу оруулсныг дуучин дуулдаг.
Дуучны үнэ цэн ингэж зохиолч, аялгуучин хоёрын дараагаар илэрдэг. Монголд энэ байдал алдагдсан. Гүйцэтгэгчид эх баригчаасаа, үүтгэгчээсээ илүү үнэ цэнтэй, илүү үнэлгээтэй болсон. Дуу зохиогчид дуучиндаа үнэ төлж дуулуулдаг болсон. Гүйцэтгэгчид гүйцэгдэхээ байсан. Яг үүнтэй адил багш үнэ цэнгүй болсон.
А үсэг зааж, амьдралын хүрд уншуулсан багш нар цалин нь бага, царай гундуу байх болоод удсан. Аргаа бараад Солонгост хар ажилд шамдан, визэнд дугаарладаг болоод удаж байгаа. Ингэж боловсролын сүү хөхүүлсэн, борвийг нь тэнийлгэсэн багш нараа манай улс үнэгүйдүүлсэн.
Үр дүн нь чанаргүй боловсрол, царай муутай улс л болж байгааг эрх биш бүгд зөвшөөрөх биз. Энэ цагт Л.Оюун-Эрдэнийн, багшаар суралцагсдыг төрөөс төлбөрийг нь дааж сургана гэдэг цагаа олсон үйлс мөн үү гэвэл мөөн. Ингэж эхлэх нь чухал.
Эрдмээр улсаа чимэхийн тулд багшаа эхлээд бэлдэх нь гарцаагүй. Дархлаатай, чанартай багш бэлтгэх. Гэхдээ энэ чухал үйлсийг нэмэн төгөлдөржүүлмээр илүү олон зүйлс бий. Багш нарын цалинг шат дараатай нэмэх, багшид ноогдох ачааллыг бууруулах, хөдөө орон нутаг хотод ялгалгүй тогтвор суурьшилтай удаан хугацаанд ажилласан багш нарт орон сууцны дэмжлэг үзүүлэх, цалингийн нэмэгдэл үзүүлэх зэрэг олон хөшүүргийг нэммээр байгаа. Бага оноотой бус, дээгүүр оноотой хүүхэд багшийн сургуулийг илүү сонгон суралцах урам таашаалыг нэмэгдүүлэх хэрэгтэй. Суралцагсдын төлбөр дааснаар асуудлын төгс төгөлдөр үүсэхгүй.
Боловсролын чанар, боловсролын эх бол улсын хөгжил, үндэстний манлайллыг үзүүлнэ гэдгээр, мөнөөх эхэнд өгүүлсэнчлэн үүтгэгчийн үнэ цэнийг өргөх агуулгаар илүү боловсронгуй арга, механизмыг боловсролын салбарын тэргүүлэх үзэл санаа болгох хэрэгтэй.
Математик, физик, хими зэрэг суурь шинжлэх ухааны хичээлүүдэд онцгой анхаарах ёстой. Дунд сургуулиудын лаборатори бааз, техник технологийг сайжруулах, эдгээр хичээлийн чиглэлээр багшийг гадаадад суралцуулахыг системтэй дэмжих, олон улсад амжилт үзүүлэгч багш сурагч нарыг улсын гавьяат, төрийн шагналаас дутуугүй урамшуулж, үнэлгээ, сурталчилгаагаар нийгэмд таниулж, манлайллын үлгэрийг үзүүлэх хэрэгтэй.
Хүн төрөлхтний өнөөдрийн эзэмшсэн бүхэн физикийн шинжлэх ухааны ололт дээр суурилж байгааг гүн ойлгуулах нь чухал.
Үндэсний монгол хэл бичгээ төгс сурахгүйгээр ертөнцийн хүн болох боломжгүйг илүү таниулан, сэтгэл тольтод нь дархлаа болгох хэрэгтэй.
Энэ мэтээр, боловсролын салбарт Ерөнхий сайдын эдүгээ эхлүүлэн давлагаалуулж байгаа сайн үлгэрийг илүү олон хувилбараар, нэмүү үйлсээр шаглаж хөгжөөх хэрэгтэй юм аа.
"Мал дагавал ам тосодно" гэдэг шиг одооноос бид эх орны ирээдүй болсон хүүхэд багачуудын боловсролд нухацтай анхаарч байж улс орноо хөгжүүлнэ гэдгийг ойлгох цаг болсон.
Энэ эрхэм үйлийг эхлүүлэгч нь Ардын багш нар учраас боловсролын хөгжлийг тэднээс эхлэх нь чухал.
Б.БАЯР
Амлалт.мн
