Дэлхийн бусад улс орнуудын улс төрчдийн амлалтаа хэрхэн хэрэгжүүлдэг, хэрэгжүүлж чадаагүй бол ямар хариуцлага хүлээдэг талаарх мэдээ мэдээллийг манай сайт цувралаар бэлтгэн хүргэхийг зорьж байна.
Энаэ удаад бид Япон улсын Ерөнхий асан Хатояма Юкио талаарх мэдээллийг хүргэе.
2009 оны 8 дугаар сард Японд явагдсан сонгуулиар Японы Ардчилсан нам ялалт байгуулж, 1996 оноос хойш анх удаа Японы хамгийн том улс төрийн хүчин болох Либерал Ардчилсан нам цөөнх болжээ.
Энэ сонгуульд Ардчилсан Нам ялалт байгуулахад тус намын даргаар сонгогдоод удаагүй байсан Хатояма Юкио голлох үүрэг гүйцэтгэсэн түүхтэй. Хатояма сонгуулиас гуравхан сарын өмнө намын даргын ажлаа авсан даруйдаа сонгуулийн тун зоримог амлалтуудыг өгч эхэлжээ.
Түүний толгойлсон Ардчилсан нам төрийн албыг үндсээр нь шинэчлэх, хүүхэдтэй айл өрхүүдэд сар тутам мөнгөн тэтгэмж олгож, шатахууны татварыг танах, тариаланчдад санхүүгийн дэмжлэг үзүүлэх, төрийн мэдлийн бүх ахлах сургуулийг төлбөргүй болгох, хөдөлмөрийн хөлсний доод хэмжээг нэмэх, зарим төрлийн татварыг нэмэхгүй байх амлалтыг өгч байв.
Гадаад бодлогын хувьд АНУ-аас хамаарсан гадаад бодлогыг өөрчилж, Азид төвлөсөн гадаад бодлого хэрэгжүүлэх, АНУ-тай тэнцвэртэй харилцдаг болох, гадаад бодлогын шийвэр гаргалтыг ил тод болгохоор амлаж байв.
Хатоямагийн амлалтууд шууд үр дүнгээ өгч парламентад 113 суудалтай байсан Ардчилсан нам 308 суудалтай болж, нийт 480 суудалтай парламентад дангаар олонх болсноор Засгийн газраа саадгүй бүрдүүлж, Хатояма өөрөө Ерөнхий сайд болжээ.
Хатояма ажлаа авсныхаа дараа сонгуулийн зарим амлалтаа биелүүлсэн. Тухайлбал тариаланчдад тэтгэмж өгдөг болж, ахлах сургуулиудыг төлбөргүй болгох амлалтаа биелүүлж чадсан. Мөн боловсролын төсвийг нэмж, хүүхдийн тэтгэмж өгөх эрх зүйн үндсийг бүрдүүлсэн.
Гэвч Хатояма гадаад бодлогын амлалтуудаа биелүүлэхэд шууд хүндрэл учирч эхлэв. Тэр амлалтаа биелүүлж Окинава арал дээрх АНУ-ын цэргийн баазыг гаргахыг оролдож байсан нь бүтсэнгүй. АНУ 2006 онд байгуулсан хэлэлцээрийн дагуу Окинава дахь цэргийнхээ асуудлыг зохицуулна гэж мэдэгдэж, нөгөө талаас намынхан нь түүнд шахалт үзүүлж байв.
Улмаар Хатояма Ерөнхий сайд болсноосоо 9 сарын дараа буюу 2010 оны 6 сарын 2-нд намынхаа хурлын өмнөхөн Окинава дахь АНУ-ын цэргийн баазыг хаах амлалтад хүрээгүй болохоо хүлээн зөвшөөрч, намын дарга, Ерөнхий сайдын ажлаасаа чөлөөлөгдөх хүсэлтээ өгсөн үтүхтэй. Товчхондоо Хатояма АНУ-ын Ерөнхийлөгч Обаматай аюулгүй байдлын үндэслэл шалтгаануудыг харгалзан Окинава дахь цэргийн баазыг үлдээх тохиролцоонд хүрсэн нь амлалтаасаа ухарсан үйлдэл болж олон нийтийн хүчтэй эсэргүүцэлтэй тулсан.
Түүнээс хойш 2012 оны 12 сард Японд дахин сонгууль явагдаж эрх баригч хүчин солигдох хүртэл Ардчилсан Намын дарга, Ерөнхий сайд хоёр удаа солигдсон. Харин 308 суудалтай хэт олонх байсан Ардчилсан Намын гурван Засгийн газар эрх барих хугацаандаа АНУ-аас хамааралгүй гадаад бодлого хэрэгжүүлэх амлалтаа биелүүлж чадаагүй тул 2012 оны сонгуулиар ердөө 57 суудалтай үлджээ.
Амлалт.мн
