Улсын их хуралд Дорнод аймгаас нэгэнтээ сонгогдсон Пүрэвийн Алтангэрэл алим тарьсан, түүнийгээ бойжуулсан шигээ ярьж зогсоно. Уг нь бол Өвөрхангайн Богдын хүн. Дорнодод аж төрж, шүлэг бичиж, багшилж, уухдаа ууж, идэхдээ идэж яваад л УИХ-д нэг сонгогдсон.

Сонгууль болгоноор аймагтаа очиж, би хүний дээд, намайг л сонгоод өг, улсаа хөгжүүлнэ гэдэг Увсаа ч олигтой хөгжүүлж чадаагүй Б.Чойжилсүрэн, Ч.Хүрэлбаатар нарын дэргэд мөн гоё харагдаж байгаа биз.

П.Алтангэрэл төрийн нарийн бичгийн дарга нэг хэсэг хийсэн. Тэрийгээ өгчихөөд л энүүхэн баруун тийш, Цанын баазын тийш гараад явчихсан. Газар аваад модыг төрөл төрлөөр нь тарьсан. Жимс ногоог чухам янз янзаар нь ургуулсан. Үхэр авч, эрчимжсэн мал аж ахуйг жимбийлгэн, шар шахсан шиг суудаг. Эрүүл агаарт, элдэв бусын улс төржихгүй, хоёр дугуйт зайдалж, монгол дээлээ жавхайлгаад, сайхан монгол, гол нь нэн бүтээлч, зөв сайхан амьдрахуйн үлгэрийг урлаж байна.

УИХ-д нэг л суусан хүн. Ийм сайхан, хар хоргүй, намуун төлөв, үлгэр жишээ аж төрж байна шүү дээ. Одоогийн УИХ-д байгаа, гурав, түүнээс дээш удаа суусан нөхөд П.Алтангэрлээс суралцах хэрэгтэй юм аа.

Б.Бат-Эрдэнэ, Н.Энхболд, Сү.Батболд, Ч.Хүрэлбаатар, Б.Чойжилсүрэн, Ц.Мөнх-Оргил, Л.Энх-Амгалан, Х.Болорчулуун, Ц.Даваасүрэн, Д.Сарангэрэл гээд өчнөөн хүн байна. П.Алтангэрэл эд нартай л хамт УИХ-д байсан хүн.

Алтангэрэл алим ургуулж явна, харин эд яасан, УИХ-даа суусаар, утаатай нийслэлээ захирсаар, нүхэн жорлонтой улсаа мандуулна гэж сонгогдсоор нүглийн нүдийг гурилаар хуурахын үлгэртэй яваагаа үгүй гэх үү.

Та нар П.Алтангэрэлээс суралц л даа. Алим яаж тарьдаг, модыг яаж усалдаг, УИХ, Засгийн сайд дараалан хийлгүйгээр яаж энгийн амьдарч болдог, адаглаад үнээ үхэр хэрхэн шимтэйг судла л даа. Эрх мэдэлгүйгээр, энгийн аж төрөхдөө яаж бүтээлч, яаж амьдралын үнэн болоод яруухныг төгөлдөр урлан эрх мэдэл хэрэгжүүлж болдгийг судлаач, суралцаач.

П.Алтангэрэлийн мод тарьж байгаа үйлс гэхэд та нарынхаас хэд дахин том агуулгатай бүтээн байгуулалт. У.Хүрэлсүх Ерөнхийлөгчийн тэрбум мод хөтөлбөр ийм л чин нот хүмүүсийн үйлсээр биежих учиртай.

УИХ, Засгийн газарт ямба эдлэн өчнөөн жил суухдаа эдгээр хүмүүс ганц дулааны станц барьчихгүй, өнөөдөр Б.Чойжилсүрэнгээрээ урдаас коксжсон нүүрс авахуулаад сууж байгаа түшээд шүү дээ. Ичиж үхмээр. Ийм байж, ингэсэн атлаа яаж дахин дахин сонгогдох хүсэл тачаалдаа умбадаг байна аа.

Өөрсдөөс нь өөр төр барих хүнгүй юм шиг, тийм хүн байхгүй юм шиг тийм их ихэрхэл тэднийг энэ хүртэл явуулж. Одоо болсоон, ойрын ахуйгаа тэтгэж ард түмэндээ тусал.

Та нар хорь гучин жил төрийн толгойд суулаа. Өөрсдөө л баяжлаа. Өөрсдийнхөө ургийн модоо төрөөр тэтгэлээ. Өөрөөр огт гавьсангүй. Худлаа гэвэл хөрөнгө өрөнгө орлогын мэдүүлгүүд чинь хэлээд өгнө.

Та нар зүгээр П.Алтангэрэлээс суралцаж, энгийн сайхан амьдар. Мод тарь.

Ёс суртахууны мод тарь, эрх мэдлээс ангижирч, эрүүл болохын ухамсараар мод тарь. Энэ том үйлс байх болно.

Ард түмэндээ амлаад хийгээгүй ихийн тань нүглийг нимгэлнэ.

Б.БАЯР

Amlalt.mn