Монгол улс 200 гаруй мянган төрийн албан хаагчтай. Төрийн албан хаагчийн хүний нөөцийн бодлогыг гаргаж, тэдний эрх ашгийг хамгаалж, төрийн албаны хуулийг хэрэгжүүлж сурталчилж ажилладаг байгууллага болох төрийн албаны зөвлөл гэж институци байх.
Харамсалтай нь энэ байгууллага үндсэн үүргээ хэрэгжүүлж чадахаа байгаад удлаа. Товчхондоо хүнээр бол “амь тавих” гээд сэхээний орон дээр гарчихлаа гэж хэлж болох.
Ингэж хэлэхийн учир нь Төрийн албаны зөвлөл нь төрийн албаны тухай хуулийг хэрэгжүүлэхээс илүүтэй улстөрчид, УИХ-ын гишүүд, сайд дарга нарын дохио заавраар алба хаагчдыг томилж, төрийн албаны шалгалтад тэнцээгүй, шалгуур болзол нөхцөлийг нь хангаагүй хүмүүсийг “Түр орлон гүйцэтгэгч” нэрээр ажиллуулахыг нь эс үйлдлээрээ зөвшөөрсөөр, хуулийг хэрэгжүүлэлгүй “ажилласаар” удлаа. Тэр байтугай төрийн албаны сонгон шалгаруулалтад орж, хамгийн өндөр оноо авч чадсан мэргэшсэн албан хаагчийг тухайн байгууллагын удирдах албанд томилох ёстой хуулийн заалтыг хэрэгжүүлдэггүй, хэрэгжүүлэхийн төлөө “ажилладаггүй”, төрийн албаны хууль тогтоомж зөрчсөн шийдвэрийг хүчингүй болгох шаардлага тавьдаггүй гээд олон зөрчил энэ байгууллагад байна.
Төрийн албанд нэг ч жил ажиллаж үзээгүй, төрийн албаны ерөнхий тусгай шалгалт өгөөгүй, өгсөн ч тэнцээгүй атлаа улс төрчдийн, дарга нарын танил тал, ураг төрөл, ах дүү, хамаатан садан, хамаарал бүхий этгээд гэдгээрээ “түрий барьж” төрийн албанд ажилласаар байгаа жишээг олныг дурдаж болохоор байна.
Нийслэлийн хэмжээнд төрийн тусгай албаны алба хаагчид, хурандаа нар удирдлагын багийн томилгооны гол бай болж байхад Төрийн албаны зөвлөл ямар нэг байр суурь илэрхийлэхгүй байсаар байна.
Мөн ковидын үед төрийн албаны хуулийн үйлчлэлийг “түр зогсоон”, Ковидын хуулийн хүрээнд төрийн олон байгууллагын дарга удирдлагыг “түр орлон гүйцэтгэгч” –ээр томилсон ч, ковидын хуулийн хэрэгжилт дуусаад нэг жил болох гэж байхад “Түр орлон гүйцэтгэгчид” ажилласаар л байна. Үүнд Төрийн албаны зөвлөл анхаарлаа хандуулан, хуулийг хэрэгжүүлж, “мэдэгдэл” нэртэй албан бичиг өгөөд зогсохгүй “Түр орлонгууд”-ыг үтэр түргэн чөлөөлөх ёстой.
Хэрэв эдгээр ажлыг шат дараатай, үнэнч шударгаар хэрэгжүүлж, төрийн албаны тухай хуульд заасан чиг үүргээ хэрэгжүүлж чадахгүй юм бол Төрийн албаны зөвлөлийг нэн даруй татан буулгаж, тараах нь зүйтэй. Ийм л учраас бид төрийн албаны зөвлөлийг хүнээр бол “сэхээний орон дээр гарчихлаа” гэж хэлээд байгаа юм.
Цаашдаа төрийн албаны зөвлөл гэдэг энэ байгууллага нэг бол нэг бол сэхээний орноосоо өндийж, улс төрчид, сайд дарга нарын заавар зөвлөгөөнөөр ажиллалгүй хуульд заасан бүрэн эрхээ хэрэгжүүлж ажиллах эс бөгөөд татан буугдах гэсэн хоёр зам л үлдэж байна.
Ц.Мөнх
Amlalt.mn
