УИХ-ын чуулганы хуралдаанаар 2024 оны төсвийн төслийг дагалдуулан өргөн барьсан хуулийн төслүүдийг хэлэлцлээ. Энэ үеэр дараах хэлэлцүүлэг өрнөлөө.
УИХ-ын гишүүн Ш.Раднаасэд: -Хавдрын эмнэлгийн төсөв жил ирэх тусам өсж байна. Бараг сараар өсөж байна. Өнгөрсөн хавар 90 сая ам.доллар байсан төсөв одоо 178 сая болсон байна. Бариулахгүй байх сонирхол байгаа юм уу, эсвэл нэгмөсөн сайн чанарын юм барчихъя гээд ингээд байгаа юм уу. Анх нэг тэрбум төгрөгөөр зураг төслийг нь хийж өгнө гэчихээд одоо яахаараа хоёр тэрбумыг нэхээд сууж байдаг юм бэ?
Сангийн сайд Б.Жавхлан: -Хавдрын эмнэлгийг зураг төслийн төсөв 960 сая төгрөгийг 2021 онд тухайн үеийн Барилга, хот байгуулалтын багцад оруулсан. Зураг төслийг нь "Хот төлөвлөлтийн хүрээлэн" гэдэг компани гүйцэхээр гэрээ хийж зургийн даалгавраа авсан. Энэ ажил одоо болтол дуусаагүй байна. Нэмэлт төсөв нэхээд байна гэж тайлагнасан. 996 сая төгрөгөөс 476 саяыг нь авчихсан байгаа.
Барилга хот, байгуулалын яамны төрийн нарийн бичгийн даргын үүргийг түр орлон гүйцэтгэгч Ц.Баярбат: -Хавдрын эмнэлгийн зураг төслийн эскиз хийгдсэн. Нийтдээ таван блок барилгын эскиз хийгдсэн. Анх өгсөн зургийн даалгавраас талбайн хэмжээ нэмэгдэж байгаа учраас үнээ өсгөх санал ирүүлсэн. Манай яамнаас ажлын хэсэг гаргаад ажлыг нь нягтлан шалгаж байгаа.
УИХ-ын гишүүн Ш.Раднаасэд: -2021 оны арваннэгдүгээр сарын 17-нд 996 сая төгрөгөөр гүйцэтгүүлэхээр гэрээ байгуулсан байна. Гэтэл дунд нь юмаа өөрчлөөд үнийн дүн нь 3.3 тэрбум боллоо гээд сууж байна. Ийм байж болох юм уу. Анх зургийнхаа тендэрийг зарлахдаа ажлын даалгавраа тодорхой өгдөг юм байгаа биз дээ.
Эрүүл мэндийн сайд С.Чинзориг: -Манай яамнаас Хавдрын эмнэлгийн зураг төслийн ажлын даалгаврыг өөрчлөх санал огт өгөөгүй. Яагаад ингээд үнээ нэмчисэн юм бэ, манайх зургийн даалгавраа өөрчилсөн юм уу гэдгийг холбогдох хүмүүсээс нь тодруулсан. Тийм даалгавар өгөөгүй. Гэтэл гүйцэтгэгч компани нь 2.9 тэрбум төгрөг нэмж өгвөл зургийн ажлыг чинь дуусгаж өгнө гээд сууж байгаа юм билээ. Одоо зөвхөн хар эскиз зураг нь л гарсан юм билээ. Хар зургийг нь аваад энэ компаниас салах ёстой гэсэн байр суурьтай байгаа. Манай яамнаас зургийн даалгаврыг нь өөрчилчихсөн юм шиг ярьж болохгүй. Барилга хот, байгуулалын яам ийм худлаа мэдээлэл өгч болохгүй шүү.
Барилга хот, байгуулалын яамны төрийн нарийн бичгийн даргын үүргийг түр орлон гүйцэтгэгч Ц.Баярбат: -Миний хариулт буруу ойлголт төрүүлчих шиг боллоо. Зураг төслийн ажлын даалгавараас болсон гэж хэлээгүй. Зураг төсөл боловсруулах шатанд гүйцэтгэгч компани "Эмнэлгийн стандартын дагуу нийтдээ таван блок байх шаардлагатай байна. Тиймээс стандартынх нь дагуу эскиз зургаа боловсрууллаа. Цаашид энэ дагуу зураг төслийг нь хийвэл өртөг нь нэмэгдэх нь" гэсэн. Хэрэв энэ дагуу хийх боломжгүй гэвэл гэрээ цуцлах саналтай байна гэдгээ хэлсэн.
