УИХ-ын чуулганы хуралдаанаар Гэр бүлийн тухай хуулийн шинэчилсэн найруулгын төслийн хэлэлцэх эсэх асуудлыг хэлэлцлээ.

Хуулийн төслийн талаар УИХ-ын гишүүд асуулт асууж, үг хэлсэн бөгөөд хүүхдийн тэтгэлгийг нэмэгдүүлэх, эцэг, эхчүүдийн хариуцлагыг өндөрсгөх шаардлагатайг хэлж байлаа. Тухайлбал, УИХ-ын гишүүн Н.Учрал "Гэр бүлийн хуулиар гэрлэлтээ цуцлуулбал хүүхдэд 100 мянга орчим төгрөгийн тэтгэмж тогтоож байна. Тэрбум төгрөгийн орлоготой ч бай, сая төгрөгийн орлоготой ч бай хуулиар тогтоосон мөнгө өгдөг. Хүүхдийн тэтгэмжийг орлоготой нь дүйцүүлж нэмэх ёстой. Айл гэр болж тоглочихоод хүүхдэдээ хэдэн төгрөг өгч чадахгүй бол данснаас нь мөнгийг татан авч байх хэрэгтэй. Тэгэхгүй бол дандаа л хүүхэд хохирч байна" гэв.

Улмаар УИХ-ын гишүүд хуулийн төслийг дэмжиж буйг санал хураалтаар илэрхийлээд хоёр байнгын хороогоор хэлэлцүүлэх санал гаргав. УИХ-ын дэд дарга Л.Мөнхбаатар Хууль зүйн байнгын хороо болон Нийгмийн бодлогын байнгын хороогоор хэлэлцэж, хэлэлцүүлэгт бэлтгэх ажлын хэсэг байгуулна гэлээ.