Нүүрсний сонсголд яагаад дуудсаныг ерөөсөө ойлгохгүй байна гэж Чимэдийн Хүрэлбаатар хэлж сууна билээ. Нүүрсний хулгай гэдэг аймшгийн луйвар хил, гаалийнхан хүртэл оролцсон нь гаалийн бүрдүүлэлтгүйгээсээ эхэлнэ бус уу. Гаалийн газар Сангийн яаманд харьяалагддаг эх толгойтой. Ч.Хүрэлбаатар гэдэг хүн ойрын хэдэн жил Сангийн яам, Эдийн засгийн яамыг толгойлж байгаа нь үнэн байх аа.

Тэгвэл Ч.Хүрэлбаатар нүүрсний хулгай яагаад гарсныг жинхэнэ оношилж ярьж байх ёстой хүн нь мөнөөсөө мөн. Өөрөө ч нүүрсний хулгайн шүгэл үлгээгч чигтэй ажиллаж, анх мэдээлэл хэлж байсан хүнээр өөрийгөө хэлдгийг санах нийгмийн ой санамж бий. Монгол улсын хөгжил яагаад удааширч, дорвитой сайжрахгүй байгаад Ч.Хүрэлбаатар Сан болоод Эдийн засгийн хөгжлийн сайдын хувьд ч, хууль тогтоохын гишүүний хувьд ч, улс төрийн өндөр албан хашсан хорин жилтний хувьд ч хамгийн их ярих ёстой хүн. Түүнд дүн тавихад яав ч олигтой дүн гарахааргүй байна.

Тэрбээр зээлжих зэрэглэл өслөө, өсөх гэж байна, дефольтоос гарна, гарах гэж байна, гарлаа, инфляци өслөө, буурлаа, тогтворжлоо гэдэг хэдэн үгээр монголчуудаа аргацааж ирлээ. Харин ийм төсөл босголоо, ингэж улс орон станц барилаа, ингэж хөгжлийн нэн өндөр шат руу чиглэлээ гэж үнэндээ яриагүй, өөрчлөлт хийгээгүй.

Энэ үүднээсээ Ч.Хүрэлбаатар Монголын улс төрд одоо баймааргүй байна. Тэр одоо Х.Баттулгатай цус шинжлэх “дайн” өрнүүлж байна. Х.Баттулга талынхан нь эхлээд өдсөн л дээ. Та бүхний цусны бүтэц ард түмэнд сонин биш ээ. Та бүхний Монголын төлөө сэтгэл зүрх л ард түмэнд хэмжүүр болно. Энэ хэмжүүр нь, хэмжүүлэх нь та нарт алга.

Чимэдийн Хүрэлбаатар одоо шинэ залуу хүмүүст зайгаа тавиад, Эдийн засгийн сургуульдаа “Монголын эдийн засгийн урагшлахгүй буйн шалтгаан, гарц, шийдэл” лекц унших нь илүү бүтээлч, прагматик ажил болно.

Б.ДОРНО