Энэ УИХ-д монголчууд хамгийн олон эмэгтэйг сонгож, хууль тогтоолгож, төрийн эрх барих дээд байгууллагад ажиллууллаа.
Хэрэг дээрээ эмэгтэйчүүдэд итгэж найдах агуулгыг илүү гаргасан гэж хэлж болох.
Харин сонгогдсон гишүүн эмэгтэйчүүд яг ямар байв, итгэж найдан хүлээсэн хүлээлтэд хэрхэн тэнцэв гэдэгт хүмүүс янз бүр хариулах байх. Нийгмийн ерөнхий дүнгээрээ бүрэн дүүрэн оноо тавих бололцоогүйг тэдний өөрсдийн нь явж ирсэн зам харуулж байгаа.
Бадарчийн Жаргалмаа хэмээх сэтгүүлч бүсгүйг Сонгино-Хайрханы ард түмэн сонгоод л УИХ-д оруулж ирсэн. Энэ гишүүн өнгөрөгч дөрвөн жилд хэрхэн ажиллав аа гээд асуухад тоймтой хариулт олдохгүй.
Уг нь телевизийн салбарт ажилласан, нийгмийнхээ санамж, тэмүүллийг хамгийн их ойлгосон байх учиртай хүн. Гэвч энэ хүн ард түмний эрэн хүсээд байгаа захиалгад яг ямраар үйлчлэн, эрх ашиг хангав гэхэд мөн л дэвшилтэт хариулт гарахгүй юм.
Жишээлэхэд, Б.Жаргалмаагаар авторлагдан нэрлэгдэх хууль байна уу. Нэг тойргийн гишүүн П. Анужин гэхэд Нийгмийн даатгалын хуулийг эрхшээгээд, нийт хотынхон дургүй байгаа ч малчдын даатгалыг төрөөс даахаар болгочхоод бас ч гэж автортой байх шиг.
Манай Б.Жаргалмаад тэр нь алга. Хэвлэлийн эрх чөлөөний тухай дуугардаг л байх. Ажиллаж байсан салбар, хэвлэлийн эрх чөлөөнд тань хийчихмээр хууль санаачлаад хийчихээр ажил бишгүй байна.
Н.Өнөрцэцэг гэдэг хүн түгжигдээд удаж байна. Хэвлэлийн ажлаа хийхээ больё, гадуур байцаагдъя, гадуур шалгаад өгөөч гээд өдөр бүр гуйж байх шиг байна. Ингэж гараа өргөж байгаа хүнийг гадуур байцаадаг хууль санаачлах, ер нь ийм байдалд сэтгүүлчийг ортол нөхцөл байдлыг үүсгэсэн тал дээр сонсгол хийх, ёс зүйг ярих, жишиг тогтоох гээд шийдэл үлэмж нэхэгдэж байх шиг.
Сэтгүүлч мэргэжилтэй Б.Жаргалмаа таг л байна. Энэ мэргэжлийн , энэ мэргэжлээр ажилласан Д. Сарангэрэл, Б.Баярсайхан, Г.Мөнхцэцэг , П.Анужин, М.Оюунчимэг аль нь ч алга. Тийм манлайлал, урагш ердөө үзүүлэхгүй байна.
Б.Жаргалмаа уг нь манлайлж болох юм л даа. Ард түмэн сонгоод төрд илгээсэн гишүүнээ нэгэнт сонжин, чадал хүчийг нь энэ дөрвөн жилд үзчихлээ. Б.Жаргалмаад удахгүй дүн тавигдана. Дүн тавихын нь өмнө нам нь бас дүн тавьж, дэвшүүлэх эсэхийг шийдэх байх.
Б.Жаргалмаа гишүүн энд итгэл тэнүүн, хүлээлт дүүрэн байх үндэслэл байгаа юу. Нийгэм бол тэгж ханган харахгүй л байх шиг. Нүүрсний хулгай, боловсролын зээлийн сангийн шамшигдуулал, Хөгжлийн банкны хүчгүйдэл гээд өчнөөн олон асуудал нийгмийг сульдаалаа. Итгэлийг унтраалаа.
Б.Жаргалмаа гишүүн энэ бүгд дээр ямар байр суурьтай байв. Иргэнийхээ, сонгогчийнхоо итгэл найдварыг хамгаалсан, тулсан гал цогтой үг, асуудлыг мухарласан ямар байр суурь үзүүлэв. Үнэндээ тийм тод байсангүй шүү дээ.
Ердийн дундаж, нэг тэгсхийгээд л явж ирсэн гишүүн байв. УИХ-д эмэгтэйчүүдийг оруулах тал дээр Иргэний нийгмийн байгууллагууд идэвхийлэн хэчнээн их дэвшил гаргаж байна.
Нийгэмд үнэн зөвд бэхэлсэн өчнөөн хүүхнүүд идэвхтэй ажиллаж байна. Гагцхүү тийм бүсгүйчүүд УИХ-д нэхэгдэж байна даа.
Б.ДОРНО
Amlalt.mn
