УИХ-ын сонгуулийн томсгосон тойрог нь ард иргэд, олон нийт, нам эвслүүдийн толгойг гашилгаж байна. Жижиг намууд дутуугийн синдромд хамаг бэрхшээлээ тохож байгаа бол хоёр том нам, ялангуяа эрх баригч МАН илт давуу байдлаасаа болж илүү зовж байна. Бяр чадалдаа аархаад байгаагаа нуух гэж зовж байна. Ардчилсан болох гэж, ард түмнийхээ талд байгаагаа харуулах гэж, одоо дахиад нэг сонгоод өг, цэнгэлийн манлайд хүргэнэ гэх гэхдээ нүүр нь арга буюу улайж байна.
Авлигачдаасаа сална гэсэн. Тэдэнтэй нэг завин дээр яваагаа мартсан МАН дэмий л завиа худлаа үсчүүлж байна. Авлигач, хулгайч нарт айдас алга, “живэх аваас хамтдаа живнэ” гээд налайж байх шиг. Харин ч залуураас зуурчихсан.
Томсгосон тойргийг намсгасан босго гэж харж, бөөн бөөнөөрөө дахин нэр дэвших гэж, УИХ-ын гишүүн байснаа давуу тал болгож зүтгэж байна. Нөгөө л “таньдаг чөтгөр чинь байна аа, сонгоорой” гэх аргаа хэрэглэх гээд байгаа нь тэр.
УИХ-ын сонгуулийг бүсчилсэн тойргоор явуулах болсон. Бүсчилсэн тойргоо цаашдаа бүсчилсэн хөгжлийн засаг захиргаатай болгох ч янзтай яриа өрнөөд байгаа. Бас төрийн байгууллагуудыг Улаанбаатараас нүүлгэх арга хэмжээ дэс дараатай авч хэрэгжүүлэх УИХ-ын тогтоол баталчихсан. МАН-ын буюу эрх баригчдын энэхүү үйлдлийг сонгуулийн шоу гэж харж байгаа хүн ч байна.
Сонгуульд ялсан тохиолдолд “Тайван амгалан байцгаа. Үе шаттай арга хэмжээ авна л гэсэн шүү дээ” гээд хэсэг цаг авч мэднэ гэнэ. Ялагдсан тохиолдолд “Бид яг бүсчлээд хөгжүүлчих байсан юм. Та нар ёстой азгүй хүмүүс” гэж сонгогчдыг буруутгах хувилбар ч байж болох аж.
Ерөнхий сайд асан Д.Бямбасүрэн гуайн ”Өглөөний сонин”-д өгсөн ярилцлага сонирхол татлаа. Тэрээр “Бүсчилсэн хөгжлийн асуудлыг УИХ-ын сонгуулийн тойрогтоо холбоно гэдэг хийсвэр төсөөллийн үр дүн гэж хэлж болох юм. Жишээ нь орон нутгаа хэдэн бүсэд хуваачихлаа, гэтэл Баян-өлгий аймгаа тусад нь гаргаад дан тойрог болгочихлоо. Тэгээд Баян-өлгий аймгаа бүс гэх юм уу, нутаг дэвсгэр хөгжлийн асуудал ярихдаа. Энэ талаас харвал, одоогийн эдийн засгийн бүсчилсэн хөгжлийн тухай яриа бол нэлээн хийсвэр, улс төрийн өнгөтэй юм уу гэж бодогдож байна” гэжээ.
Эрх баригчид “Баян-Өлгий аймаг сонгуульд Баян-Өлгийгөөрөө орно. Харин хөгжихдөө баруун бүсдээ багтаад явчихна” гээд байгаа юм. Д.Бямбасүрэн гуайн үзэж байгаагаар эрх баригчдад бүсчилж хөгжүүлэх бодлого алга. Улсын төсвөөс бүсчилсэн хөгжлийн асуудлыг шийднэ гэдэг их эрсдэлтэй гэж байна.
Ядахдаа энэ сайхан бүсчилсэн хөгжлийн асуудлаа эрх баригчид жилийн өмнө гаргаж тавьсан бол бүтэх, бүтэхгүйн талаар шинж тэмдэг мэдэгдэх байлаа. Сонгуульд тулгаж байгаад “бүсчилсэн” нь хэнийг ч гэсэн хардахад хүргэж байна.
Т.Санаа
Amlalt.mn
