УИХ дах АН бүлгийн дарга О.Цогтгэрэл нарын нэр бүхий гишүүд өнгөрөгч оны 11 сард "Тусгаар тогтнол үндэсний баялгийн сангийн тухай хуулийн төсөл"-ийг Улсын Их Хурлын дарга Г.Занданшатарт өргөн мэдүүлсэн.
Ардчилсан намын зүгээс “Тусгаар тогтнол, Үндэсний баялгийн сан"-ийн хуулийг батлан, хэрэгжилтийг нь аль ч намын Засгийн газраас үл хамааран хэлбэрэлтгүй, тогтвортой дагаж мөрдөхийг уриалж байгаа аж.
Сонгуулийн үр дүн, улс төрийн намаас хамаарсан тогтворгүй бодлогыг эцэс болгож, байгалийн баялгийн үр өгөөжийг эзэн болсон иргэд нь нээлттэй компаний ногдол ашиг хэлбэрээр урт хугацаанд, тогтвортой хүртдэг болох ёстойг АН онцолж байгаа юм.
Ийм байдлаар хөгжиж ирсэн улс орнуудын жишээнд Норвеги улсыг дурьдаж болох юм. Тус улсын хувьд эрх баригч болоод сөрөг хүчний хоёр том улс төрийн намуудын төлөөлөл Норвегийн санг бий болгохын тулд хэлэлцээр байгуулсан байдаг. Тэд "байгалийн гол баялаг болох газрын тосноос их хэмжээний орлогодоо тулгуурлан баялгийн сан байгуулъя” гэсэн тохиролцоогоо баталгаажуулжээ.
Улс төрийн хамаарлаас хамгаалж, сонгуулийн үр дүн, амлалтаас үл хамааран өөрчилдөггүй байхын тулд улс төрийн улс төрийн хүчнүүд зөвшилцөлд хүрсэн нь тус сангийн үйл ажиллагааг амжилтад хүргэж, улс орныхоо хөгжилд хувь нэмэр оруулахад дэмжлэг болж чадсан гэдгийг судлаачид онцолдог байна.
Амлалт.мн
