Ардчилсан Намын дарга Л.Гантөмөр баялгийн сангийн хуулийн төслийн талаар өнөөдөр мэдээлэл өглөө.
Тэрбээр "Парламентад суудалтай намууд Монгол Улсын эдийн засаг, хөгжил, ардчиллын нөхцөл байдалд дүгнэлт хийгээд тодорхой асуудлуудыг хамтдаа ярилцаж, шийдэл гаргахаар нэгдлээ.
Парламентын засаглалтай байхын тулд сонгогчдын санал гээгдэхгүй байх чиглэлийн асуудлыг шийдэж, пропорциональ системийг Сонгуулийн хуульд оруулсан. Ингэснээр олон намын төлөөлөл, олон ургалч үзэлтэй Монголын парламент бүгдээрээ тойрч суугаад ярилцах боломжийг гаргасан байгаа.
Ирэх сонгуулиар нийт нэр дэвшигчдийн 30% нь эмэгтэй, нам, эвслийн жагсаалтаар орж ирж байгаа бол эрэгтэй, эмэгтэй төлөөллийг 50%, 50% байлгахаар шийдсэн.
Монгол Улс бүхэлдээ даргын улс болж, авлига руу гулсаж орох магадлал өндөр байна гэдгийг МАН, АН, ХҮН намын дарга нар хэлэлцүүлэгт орох үеэрээ ярьж байсныг санаж байгаа байх.
Улс төрийн намын шинэчилсэн хуулийг баталж, улс төрийн намаар дамжиж авлигачид төрийн толгойд гардаг байдлыг хязгаарласан. Намын санхүүжилт ил тод, хяналтад байх, улс төрийн намд цугларсан мөнгө юунд зарцуулагдахыг хуульд тодорхой заасан.
Бид популист улс төрөөс татгалзаж байгаа. Үүнээс ангижрахын төлөө хичээн ажиллаж буй МАН, ХҮН намын дарга нарт талархал илэрхийлье. Цаашид хөгжлийн хөтөлбөрүүдэд санал нийлэх хувилбаруудыг гаргаж байгаа.
"Эрдэнэс Тавантолгой" компанийг ашигтай ажиллуулж чадахгүй өнөөдрийг хүрсэн нь Монгол Улсын баялгаас жоохон юм хүртэх гэсэн, хоорондоо уралдсан, улс төрчдийн нөлөө баялгийн дээрэм тулаан рүү аваачсанаар манай орон баялгийн хараалд өртсөн. Үүнээс гарахын тулд ярилцах хэрэгтэй.
Бүх намууд үндэсний баялгийн сантай болж, сан нь улс төрөөс хараат байх зарчимд санал нэгдсэн. Баялаг эзэмшиж, ашиглаж байгаа компаниудын хараа хяналт иргэдийн гарт очих ёстой, Олсон мөнгөө ирээдүйдээ хуримтлуулах, хөгжлийн бодлогод зарцуулах, хувьцаагаар дамжуулан ногдол ашгаа авахад санал нэгдэж, санамж бичгээ баталлаа" хэмээн ярилаа.
