УИХ дахь Ардчилсан намын бүлгээс малчдын зээлийг тэглэх арга хэмжээ авах тухай тогтоолын төслийг УИХ-ын даргад өргөн барих талаар энэ долоо хоногт мэдээлэл өгсөн. Үүнтэй холбогдуулан олон нийтийн цахим сүлжээнд томоохон маргаан өрнөөд байгаа.
Улсын Онцгой Комиссоос хаваржилтын нөхцөл байдлыг өнөөдөр танилцуулах үеэр Шадар сайд С.Амарсайхан тус асуудлын талаар тайлбар өгсөн юм.
Тэрбээр "Малчдын зээлийг тэглэнэ гэсэн асуудлыг бид яриагүй байгаа. Ул суурьтай хандах ёстой. Малчид зээлийг тэглэх эсвэл хүүг чөлөөлөх талаар яриагүй. Зөвхөн төлөлтийг хойшлуулаад өгөөч гэсэн.
Цаашдаа зах зээлийн зарчим, бодит нөхцөл байдал, боломжтой нөөцтэйгөө уялдуулж нухацтай ярилцах ёстой. Одоогоор малчдын зээлийг тэглэх, чөлөөлөх асуудал яригдаагүй, эцэслэгдээгүй. Иймэрхүү боломж хомс байгаа.
Ерөнхий сайд анхаарал хандуулна гэдгээ хэлсэн. Цаг үеийн нөхцөл байдлыг дүгнэж, ямар арга хэмжээ авч хэрэгжүүлэх гэдэг нь шийдэгдэнэ" гэв.
