Баянзүрх дүүргийн АН-ыг тарааж, дараа нь нийслэлийн АН-ыг самарсан “алдарт” Д.Пүрэвдаваа АН-аас гарч, Монголын либерал намыг сонгожээ. Мэдээж хэрэг, тус намын дарга болсон. Түүний хувьд эгзэгтэй цаг үед улс төрийн нүүдэл хийж байгаа нь ганцхан шалтгаантай. Тодруулбал, АН-ын нэр дээрээс Баянзүрх дүүргийн Засаг даргаар 2012-2017 хүртэл таван жил ажиллахдаа бужигнуулсан, дүүргийн хэмжээнд намын нэр нүүрээс гадна хувь улстөрчийнхөө рейтингийг шалаар нэг хөглөрүүлчихээд 2017 онд өргөж тэтгэсэн Ерөнхийлөгч Х.Баттулгынхаа зөвлөх болж байсан түүхтэй.

Эндээс Х.Баттулга нь дэмжин, 2020 онд нийслэлийн АН-ын дарга болгосон ч газар аваагүй учраас 2023 онд Т.Батцогтод тамгаа хүлээлгэж өгсөн бололтой. Тиймдээ ч дүүрэг, нийслэлийн хэмжээнд намын болон өөрийнхөө нэр нүүрийг барсан Д.Пүрэвдаваад шинэ сонголтоос өөр арга байгаагүй л болов уу. Өөрөөр хэлбэл АН-д түүнийг дэмжих нэгээхэн ч бүлэг фракц байхгүй болсон.

Үүнийг мэдсэн нөхөр бас чиг Сонгуулийн саналын хуудсанд наймд эрэмбэтэй улс төрийн нам сонгоод ирж байгаа нь гэрэл гэгээ татуулах хэдий ч улс төрийн талаасаа тун ч таагүй сонголт.

Ядахад тус нам нь 1999 онд байгуулагдсан ч улс төрийн болон нийгмийн чиглэлд идэвхтэй үйл ажиллагаа явуулж байсан нь үгүй. Гишүүд дэмжигчид байхгүй, хөрөнгө санхүүгүй гээд олон шалтгаан байгаа ч Д.Пүрэвдаваагийн хувьд Сонгуулийн саналын хуудсан дээрх эрэмбэдээ дулдуйдаж, бусадтай эвсэх, улмаар жагсаалт руу дээгүүр эрэмбэ эдлэх санаархал байхаас хол зөрөхгүй. Ёстой л азаа үзсэн улс төр хийсэн хэрэг.

Хэдийгээр дажинтай байгаа ч АН-ын нөмөр өөр байж таарна. Ёстой л эцсийн сумаа Монголын либерал нам хэмээх сүүлчийн байнд ониллоо. АН бол Д.Пүрэвдаваа битгий хэл бүтэхгүй нөхдийг агуулсан сав. Ийм хэмжээний намаас явчихаад хамгийн идэвхгүй нам сонгож байгаа нь улс төрийнхөө замналд цэг хатгаж байгаа хэрэг болов уу. Хамгийн наад зах нь цагт ямагт улс төрийн үйл ажиллагаа явуулж байдаг Х.Баттулгатайгаа зууралдаж байсан бол бас чиг арга нь олдох байв. Тэгээд ч АН дотор “Женко” л жин дарсан хэвээр байна.

Эх сурвалж: Reelnews.mn