“Төрийн худалдан авах цахим систем"-ийн талаар өнөөдөр Нээлттэй нийгэм форумоос мэдээлэл хийлээ.
ННФ-ын Засаглалын хөтөлбөрийн менежер Д.Оюунбадам төрийн худалдан авах цахим системийн онцлог болон нэмэлт дата мэдээллийн талаар ярилаа.
“Төсвийн тухай хуульд өөрчлөлт оруулах тухай хуулийн төслийг 2023 оны 7-р сарын 7-нд эцэслэн баталсан. Хуулийн дагуу хөрөнгө оруулалтын төслүүд дахин давтагдашгүй нэгдсэн кодыг авдаг болсон. Иймээс төрийн худалдан авах цахим систем www.tender.gov.mn-д төслийн кодууд нь давхар бүртгэгддэг болж байна. Мөн төрийн тухайн худалдан авах ажиллагааны кодыг цахим системээс өгдөг. Энэ нь улсын төсвөөс өгсөн батлагдсан кодтой уялдаатай болж, мэдээллээ хайхад илүү хялбар болох юм.” гэж ярив.
Энэ үеэр Төрийн худалдан авах ажиллагааны газрын мэргэжилтнээс тодруулга авлаа.
-Төрийн худалдан авах цахим системд одоогийн байдлаар хэдэн төрөл, ямар чиглэлийн дата байршуулсан бэ?
- Төрийн худалдан авах үйл ажиллагаа болон төлөвлөлт, төсөл, тендер шалгаруулалт, зохион байгуулалт, гэрээ байгуулах, үр дүн зэргийг энэ системээс хэрхэн харж болох, мөн дата анализ яаж хийх, хэрхэн татаж авах, ямар өгөгдөлтэй датанууд энэ системд харагддаг талаар олон нийтэд танилцуулан, мэдээллээ.
-Төрийн болон ТББ, хувь иргэн зэрэг оролцогчид энэ цахим системийн талаар ямар санал бодол хэлж байна вэ?
-Цахим системийн үйл ажиллагаа болон мэдээллийн багтаамжийг сайжруулах талаар иргэд болон бусад харилцагч байгууллагууд санал бодлоо хэлж байгаа. Түүнчлэн “Төрийн худалдан авалтын үйл явц, гэрээ байгуулсан болон үр дүнгийн талаар сайн, муу талаас нь хэлмээр байдаг. Иймээс төрийн худалдан авалт болон гэрээ байгуулж дууссантай холбоотой үйл ажиллагаанд олон нийтийн оролцоог илүү их дэмжсэн санал хүсэлтийг танай системийн хаана нь оруулдаг байх вэ, цахим системдээ коммент бичдэг хэсгийг байршуулж өгөөч” гэж хүсч санал тавьсан.
Б.БАЯРМАА
