“Эрдэнэс алт ресурс” ХХК-ийн таван жилийн ойн онол практикийн бага хурал “Өнгөрсөн, одоо, ирээдүй” сэдвийн хүрээнд өнөөдөр Блю скай тауэрын “Emerald” хурлын танхимд боллоо.
Бага хурлаар “Эрдэнэс монгол нэгдлийн стратеги төлөвлөгөө”, Бүсчилсэн хөгжлийн үзэл баримтлал”, “Уул уурхайн салбар дахь төр, хувийн хэвшлийн үр дүнтэй хамтын ажиллагаа”, “Уул уурхайн салбар дахь инноваци”, “Уурхайн хаалтын менежментийн төлөвлөгөө боловсруулахад иргэдийн оролцоог хангах нь”, “Эрдэнэс алт ресурс” ХХК-ийн стратеги төлөвлөгөө” зэрэг илтгэлүүд тавигдаж, хэлэлцүүлэг өрнөв.
“Эрдэнэс алт ресурс” ХХК-ийн гүйцэтгэх захирлын үүрэг гүйцэтгэгч Э.Ууганбаяраас бизнесийн амлалтын талаар тодруулав.
-“Эрдэнэс алт ресурс” компани ойрын төлөвлөгөөгөө хэрхэн амлаад байна вэ?
-Бид таван жилийн ойдоо зориулан таван бүтээлч ажил санаачлан өргөн хүрээнд хамтарч ажиллаж байна. Манай хэтийн төлөв Монгол Улсдаа нэмүү өртөг шингэсэн эцсийн бүтээгдэхүүн гаргахаар зорин ажилладаг. Бид хаягдлыг дахин боловсруулах үйлдвэр барьж, үүсмэл ордыг Монгол Улсад анх удаа ашиглан, үйл ажиллагаагаа жигдрүүлэхээр дорвитой алхмуудыг хийж байна.
Манай компани 100 хувь төрийн өмчит үйлдвэр. Төрийн зүгээс гарч буй бодлого шийдвэрт үндэслэн Эрдэнэс алт ресурс компанийн хугацааны бизнесийн төлөвлөгөөгөө боловсруулж байгаа. Хамгийн ойрын хугацаанд хэрэгжүүлэх алтны төслүүдийг эдийн засгийн эргэлтэнд оруулахаар амлан, судалгааны ажил хийгдэж байна.
-КОВИД-оос хойш Засгийн газартай хамтарч ямар хэмжээний санхүүжилттэй төсөл дээр ажилласан бэ?
-Бид КОВИД-ын үед үйлдвэрээ хэвийн байлгахын тулд зөв бодлогуудыг баримталж ажилласан. КОВИД-ын хүнд үед хоёрдугаар баяжуулах үйлдвэрээ ашиглалтад оруулснаар бүтээгдэхүүн боловсруулах хэмжээ өссөн. Жилд 7000 тонн баяжмал гаргахаар төлөвлөж байлаа. Өнгөрсөн онд үйлдвэрээ улсын комисст амжилттай хүлээлгэн өгснөөр 14000 тонн баяжмалыг үйлдвэрлэсэн. Улмаар борлуулалтын орлогын хэмжээгээ 127 хувиар давуулсан амжилттай байна.
Б.БАЯРМАА
