МАН-ын Удирдах зөвлөлийн хурал хоёр өдрийн өмнө дуусч, Бага хурал эхэлсэн. Хуралдаанаар УИХ-ын 2024 оны сонгуульд МАН-аас тойрог болон намын жагсаалтаар нэр дэвшүүлэх гишүүдээ тодруулсан.

Харин Монгол Улсын Их Хурлын гишүүн Г.Амартүвшин 2024 оны УИХ-ын сонгуульд нэр дэвшээгүй гэдгээ мэдэгдээд байна.

Тэрбээр “Улс төр бол хувь хүний амбицын асуудал биш. Би сонгуульд нэр дэвшихгүй. Намын болон улсын эрх ашгийг бодох хэрэгтэй. Шинэ залуустаа боломж олгохоор шийдсэн.

Хөгжлийн Банкны асуудлаар би хоёр шатны шүүхээр шалгагдаж, гэм буруугүй нь тогтоогдсон. Энэ асуудал ямар нэгэн байдлаар манай намын сонгуулийн үйл явцад битгий нөлөөлөөсэй гэж хүсч байна. Би улс төрд карьер хараагүй. Мэдлэг, боловсрол туршлагаа эх орондоо зориулж, хувь нэмрээ оруулъя гэж бодсон” гэж хэлжээ.

Мэргэжлийн банкир, эдийн засагч, хөрөнгө оруулагч тэрээр 20 орчим жил гадаад, дотоодын томоохон банкуудад ажилласан туршлагатай залуу. УИХ-ын гишүүн болохын өмнө Хас Банкыг олон жил амжилттай удирдаж байсан.

1999 онд Амстердамын ABN AMRO банкинд дадлагажигчаар анх ажиллаж, улмаар эрсдэлийн удирдлага, худалдааны санхүүжилт зэрэг хэлтсээр дамжин Лондон, Чикаго, Хьюстон хотуудад ажилласан байна. 2005-2007 оны хооронд Харвардын Бизнесийн Сургуульд MBA-д суралцсан. Дараа нь Казакстаны хамгийн том банк болох Kazkommertsbank банкинд Арилжааны эрсдэл хариуцсан дэд захирал зэрэг албан тушаалуудыг гадаадын байгууллагуудад хийж байлаа.

2011 онд Монголдоо ирж, 2019 он хүртэл Хас Банкны захирал, 2019 оны дундаас хагас жилийн турш Хөгжлийн Банкны гүйцэтгэх захирлаар томилогдон ажилласан. Удалгүй УИХ-ын гишүүн болж, улс төрийн улаан хивсэн дээгүүр хэдэн жил алхсан түүхтэй.

УИХ-ын гишүүн болсныхоо дараа Хөгжлийн банкны гүйцэтгэх захирал байхдаа албан тушаалаа урвуулан ашигласан зээлтэй холбоотой асуудал нь сөхөгдөж, шүүхээр үнэн мөнөө тогтоолгож, чимээгүй болсон.

Тэрбээр улс төрөөс халширав уу, эсвэл Хөгжлийн банкны луйвартай холбоотой асуудалд холбогдсондоо сүлд золбоо нь уналтанд орсон үү, ямар ч байсан 2024 оны сонгуулиас эрс татгалзчихлаа.

Г.Амартүвшин нэгэн сайтад ярилцлага өгөхдөө “...эмээ маань миний амьдралд их нөлөө үзүүлсэн хүн. Эмээ маань ХААИС-ийн ректор, багш байсан юм. Хүүхэд байхад Богд уулаар өдөржин дагуулж алхдаг, байгаль дэлхийтэй танилцуулдаг байв. Надад "Тайвшир, тэвчээртэй бай" гэж их хэлдэг байсан.” гэж ярьжээ.

2024 оны УИХ-ын сонгуульд нэрээ татсан тэрбээр эмээгийнхээ зөвлөснөөр энэ удаад “тэвчээр” заалаа. Магадгүй, долоо хэмжиж, нэг огтол гэдэг шиг алсаас улс төрөө тандан ажиглах ч юм бил үү. Эсвээс санхүүгийн салбартаа хөрөнгө эргэлдүүлэх ажлуудаа амжуулахаар өөртөө амлалт өгсөн үү? Хэн мэдэх вэ? Г.Амартүвшин өөрөө л мэднэ.

Б.БАЯРМАА