Сонгуулийн сурталчилгаа хаахад хоёр өдөр үлдэж байна. Өнөө жилийн сонгуулийн сурталчилгааны ерөнхий өнгийг харвал хар пи ар багатай, харьцангуй намуухан төлөвтэй явагдах шиг боллоо. Ц.Элбэгдорж, Б.Хурц гэдэг хүмүүсийг харлуулах, тэдний бий болгосон түүхийг сэвэх маягаар л ерөнхий сэдэв явлаа.
АН ялбал Ц.Элбэгдорж Ерөнхий сайд болно гэх маягийн пи араар отголж байх шиг байна.
Бас Ц.Элбэгдорж долоон сарын нэгнийг давтах гэж байна гэх маягийн юм бас явах шиг боллоо. Эдгээр эвэр хошуулсан бошгоос аль нь ч болохгүй байх аа. Харин одоо энэ үлдэж байгаа цөөн цагт нэг зүйл л үгүйлэгдээд байна. Энэ бол улс төрийн намуудын дарга нарын мэтгэлцээн. Үндэсний эвслийг толгойлогч Н. Номтойбаяр удаа дараа намуудын дарга нарыг уриад, мэтгэлцье гээд байх шиг байна. Энэ бол тун зөв л дөө. Улс төрийн намуудын дарга нар эгнэж зогсож байгаад, бодлого, мөрийн хөтөлбөрөө яриад, мэтгэлцээд, ус тос нь ялгарч харагдвал уг нь тун зүгээр байдаг.
Гэтэл ийм мэтгэлцээн болохгүй бололтой.
Уг нь боломж байна шүү дээ. Заавал телевиз гэхгүй, цахим орон зайд, клабхаус энэ тэр гээд боломж бол маш их байна. Зарим дарга нар нь оролцохгүй байсан ч, зарим нь болзоод, мэтгэлцээд сонгуулийн сурталчилгааны хаалтын мэтгэлцээн заавал хиймээр л байна.
Энэ бол монголчуудын эрх ашиг. 126 суудлын төлөө мянга гаруй хүн нэр дэвшиж байгаа шүү дээ. Энэ мянган хүнийг төлөөлж намуудын дарга нар нь яриад, хэний нь нам Монголд, ард түмэнд ойр холын өгөөжөө өгмөөр байгааг ард түмэн сонжих бүрэн эрхтэй юм. Ингэх ёстой юм.
Тийм болохоор намуудын дарга нар мэтгэлцээний индрийн ард зогсоосой. Л.Оюун-Эрдэнэ, Л.Гантөмөр, Н.Номтойбаяр, Б.Батбаатар, Ц.Оюунгэрэл, Ц.Гантулга гээд энэ олон намын дарга нар мэтгэлцмээр байна. Үзэгдмээр байна. Харагдмаар байна.Ойлгогдмоор байна.
Б.БАЯР
АМЛАЛТ.МН