Монгол Улсын Засгийн газраас “20 минутын хот” буюу иргэд оршин суугаа газраасаа төрийн үйлчилгээг 20 минутад авах стандартыг бий болгох шинэчлэлийн хүрээнд Цахим хөгжил, харилцаа холбооны яам, Төрийн цахим үйлчилгээний зохицуулалтын газар нь төрийн үйлчилгээг “ХУРДАН” цэг, хөдөлгөөнт “ХУРДАН” цэг, “ХУРДАН” киоск төхөөрөмжөөр дамжуулан иргэдэд хүргэж байгаа билээ.
Тус ажлын хүрээнд “ХУРДАН” цэгийн үйлчилгээг нийслэлийн хэмжээнд Чингэлтэй, Хан-Уул, Багахангай, Налайх дүүргийн бүх хороонд үе шаттайгаар нэвтрүүлсэн.
Тэгвэл Нийслэлийн алслагдсан Багануур дүүргийн бүх хороонд “ХУРДАН” цэгийн үйлчилгээ нэвтэрч, тус дүүрэгт оршин суугаа 28 мянга гаруй иргэн төрийн үйлчилгээг анхан шатны нэгж байгууллага буюу хорооноосоо өндөр насны тэтгэвэр тогтоолтын хуудас, төрсний бүртгэлийн лавлагаа, хугацаа хэтэрсэн зээлийн өртэй эсэх лавлагаа, шүүхийн шийдвэрээр бусдад төлбөргүй эсэх тодорхойлолт, иргэний эрүүгийн хариуцлага хүлээж байгаа эсэх тодорхойлолт зэрэг төрийн 43 байгууллагын 478 төрлийн үйлчилгээг нэг дороос авах боломж бүрдлээ.
Тус арга хэмжээнд:
- Цахим хөгжил, харилцаа холбооны яамны Цахим хөгжлийн бодлогын хэрэгжилтийг зохицуулах газрын дарга Б.Билэгдэмбэрэл,
-Төрийн цахим үйлчилгээний зохицуулалтын газрын дарга П.Батбаатар,
-Багануур дүүргийн Засаг дарга С.Даваасүрэн нар оролцож, төрийн цахим үйлчилгээний талаар иргэдийн сонирхсон асуултад зөвлөгөө, мэдээлэл хүргэлээ.
Мөн "ХУРДАН" киоск төхөөрөмжийг дүүргийн бүх хороонд болон хүн амын төвлөрөл ихтэй байршилд буюу Улсын бүртгэлийн хэлтэс, Эрүүл мэндийн төв, Минимакс ХХК, Багануур ХХК-ийн байранд тус тус байрлуулав.
