Монголчууд маргааш төр барих дээд байгууллага болох УИХ-ын гишүүдийг сонгох саналаа өгнө. Өөрсдийгөө төлөөлүүлж төр бариулах хүнээ сонгоно. Хүн тус бүртээ хэнийгээ, ямар намыг сонгохоо бараг товлочихоо биз ээ. Ямар нэг байдлаар сонголтоо хийчихсэн байх. Гэхдээ монголчууд, одоо алдаагүй сонголт л хиймээр байна. Алдаагүй сонголтын эхний мөрдлөгөө бол бусдын боломжийг хулгайлдаггүй хүнийг сонгох явдал юм. Нийтээрээ, хамтаараа нэг гараанаас явах ёстой атал эрх мэдэл албан тушаалаа ашиглаж бусдынхаа боломжийг хулгайлчихдаг хүнийг огт сонгож болохгүй.
Хамт олон байлаа гэхэд, хамт олныхоо нэрээр урагшилж яваа ажлынхаа шимийг ганцаараа хүртдэг хүнийг сонгож болохгүй. Ийм хүн бусдынхаа хөдөлмөрөөр бүтсэн шимийг зөвхөн өөрөө олсон мэт шимэгчилдэг. Ийм хүн нийтийн эрх ашгийг хөсөрдүүлдэг.
Ийм хүнийг монголчууд сонгож огт болохгүй. Нөгөө нэг чухал зүйл ойлголт бол эрх мэдэл, мэдээлэлд ойроороо бусдын боломжийг хулгайлдаг, өөрөө л хүртдэг хүнийг сонгож болохгүй.
Компани байлаа гэхэд захирал хийж тамга барьж байгаагаа далимдуулан, компанийнхаа нэр, ажилчдын хөдөлмөрөөр олсоныг ганцаараа, нэгээрээ хүртдэг хүнийг монголчууд сонгож болохгүй. Ийм дарга анги монголд сүргээрээ байгаа. Сүргээр нь бойжуулдаг, бойжуулсан нам байгаа. Үүнээс нь халдварласан сэтгэхүйтнүүд ч маш их.
Мэдээж, илүү хөдөлмөрлөсөн нь илүү авах ёстой. Гэтэл нийтийн малгайн дор ганцаар хийсэн мэтээр өөрөө, ганц нам хийсэн мэт өмчирхдөг бирдүүдийг л манай ард түмэн сонгож болохгүй.
Чухам ийм учраас эл амьдралд хамгийн ойр жишээнд харан, эргэцүүлэн, мянга гаруй сонгогдогсдоос жинхэнэ үнэн хүн, үнэн төрхтөнийг сонгох л Монголын ард түмний үнэмлэхүй билиг мэлмийн асуудал байна даа. Энэ бол маргааш.
Нийт монголчуудынхаа боломжийг тоногсдыг бүү сонгоорой. Нэг нь нийтийн төлөө сэтгэхүйгүй хүмүүсийг бүү сонгоорой, монголчууд аа!
Ардчиллын үнэмлэхүй төгөлдөр илэрхийлэл нь сонгох эрх. Энэ сонгох эрхээ төгс хийж зөв хүмүүсийг л сонгох хэрэгтэй.
Газрын хэвлийн баялаг, ерөөс үнэмлэхүй баялагтай гурав гаруй саяхан монголчуудаа гарыг нь алтанд бус гэхэд мөнгөнд, ганзагыг нь диваажинд бус гэхэд амьдралын чанарт хүргэчих бүрэн боломжийг дээдсээс өвлүүлсэн орон шүү дээ, Монгол гэдэг.
Монголын ард түмний сонголт мэргэн байг ээ! Надаар дутна гэж бодож хүн бүр заавал сонгуулиа өгөөрэй.
Б.БАЯР