БНСУ-тай төмөр замын салбарт хамтран ажиллах тухай санал солилцлоо. Энэхүү уулзалтад Зам тээврийн сайд Б.Дэлгэрсайхан, ЗТЯ-ны ТЗДТБЗГ-ын дарга Х.Итгэлт, мэргэжилтэн Т.Жавхлан, ЗТЯ-ны ГХАХ-ийн дарга Б.Нямдаваа, ахлах мэргэжилтэн З.Золзаяа нар оролцлоо. БНСУ-ын талаас Солонгосын төмөр замын корпорацын Ерөнхийлөгч буюу гүйцэтгэх захирал Хан Мү Хи, Хилийн чанад дахь бизнесийн асуудал хариуцсан дэд ерөнхийлөгч Ким Вон Юн, Олон улсын хамтын ажиллагааны газрын захирал Хваг Жай Шик, дэд захирал Ким Хак Со, Ерөнхийлөгч ба гүйцэтгэх захирлын хэрэг эрхлэх газрын ахлах мэргэжилтэн Хван Сеон Хо, Хилийн чанад дахь бизнес хөгжлийн хэлтсийн менежер Ён Жон Мин, Олон нийттэй харилцах албаны менежер Ли Хван Су нар оролцлоо.
БНСУ нь Монгол Улсын зам тээврийн салбарын гол түнш орны нэг бөгөөд олон чухал төсөл хөтөлбөрүүдийг хамтран хэрэгжүүлж ирсэн. Одоогоор БНСУ-тай хамтран төмөр замын салбарт хоёр төсөл хэрэгжүүлж байгааг албаныхан дурдлаа. Тухайлбал, "Монгол Улсын төмөр замын хөгжлийн стратеги Зүүн Азийн төмөр замын нийгэмлэг (EARS)-ийн үүсгэн байгуулалттай уялдах нь төсөл-ийг 2022-2024 оны хооронд хамтран хэрэгжүүлж байна. Уг төсөл нь Монгол Улсын зүүн хөндлөн (Сайншанд Хөөт) болон баруун хөндлөн (Даланзадгад-Тавантолгой) чиглэлийн төмөр замын техник, эдийн засгийн үндэслэл боловсруулах, төмөр замын техник бүтээн байгуулалтын санхүүгийн загвар, удирдлагын схем боловсруулах, Монгол Улсын логистикийн хөгжлийн стратеги болон бодлогыг хөгжүүлэх зорилготойгоор хэрэгжсэн байна.
Энэхүү төсөл нь нийт 2.46 сая ам.долларын буцалтгүй тусламжийн төсөл байсан бөгөөд 2024 оны зургадугаар сард эцсийн хэлэлцүүлгийг хийж, ТЭЗҮ болон бусад холбогдох материалыг хүлээлгэн өгчээ.
Мөн "Галт тэрэгний хөдөлгөөн зохицуулалтын нэгдсэн төвийн барилга барих, үйл ажиллагааны чадавхыг бэхжүүлэх замаар Монгол Улсын төмөр замын тээврийн өрсөлдөх чадварыг сайжруулах төсөл"-ийг 2021-2026 оны хооронд хэрэгжүүлж байна. Энэ төсөл нь ГТХЗНТ-ийн чадавхжуулах, дунд болон урт хугацааны мастер төлөвлөгөөг боловсруулах, ГТХЗНТ-ийн барилга туршилтын системийг хөгжүүлэх зорилготой юм.
Галт тэрэгний хөдөлгөөн зохицуулалтын нэгдсэн төвийн барилгын ажил өнгөрсөн дөрөвдүгээр сард эхэлсэн бөгөөд угсралтын ажил одоогоор 10 хувьтай урагшилж байна.
Цаашид БНСУ-ын төмөр замын салбарынхантай хамтран хэрэгжүүлэхээр ажиллаж буй төслүүдэд мөн анхаарал хандуулан ажиллаж байна. Тухайлбал, БНСУ-ын Олон улсын хамтын ажиллагааны агентлагт "Монголын төмөр замын засвар үйлчилгээний үндсэн технологийг сайжруулах стратеги" төслийг 2026-2028 оны хугацаанд 11 тэрбум воны санхүүжилттэйгээр хэрэгжүүлэхээр төслийн саналыг боловсруулан илгээсэн байна. Мөн Улаанбаатар Шинэ Хархорум чиглэлийн төмөр замын ТЭЗҮ-г боловсруулах төслийг 2025-2027 оны хооронд хэрэгжүүлэхээр БНСУ-ын Үндэсний төмөр замын корпорацтай хамтран хэрэгжүүлэхээр ажиллаж байна. Энэ хүрээнд 2024 оны 06 сарын 18-ны өдөр “Монголын төмөр зам” ТӨХК болон Солонгосын үндэсний төмөр зам компанитай харилцан ойлголцлолын санамж бичиг байгуулжээ. Уг санамж бичгийн дагуу талууд төмөр замын салбарт хамтран ажиллах, тодруулбал Улаанбаатар-Хархорин чиглэлийн төмөр замын ТЭЗҮ-г боловсруулах чиглэлээр хамтран ажиллахаар тохиролцсон байна.
Энэ удаа KORAIL-тай Тавантолгой-Зүүнбаян чиглэлийн төмөр замын ашиглалт, арчлалт болон “Монголын төмөр зам” ТӨХК-ийн замын ангийн бүтэц зохион байгуулалтыг сайжруулахаар хамтран ажиллах санал солилцож байна. Мөн Тавантолгой-Зүүнбаян, Тавантолгой-Гашуунсухайт, Зүүнбаян-Ханги, Сүхбаатар-Улаанбаатар чиглэлийн төмөр замуудад байгаа төмөр бетон хоолойн засвар арчлалтад хамтран ажиллахаар санал солилцов.
