Боловсролын яамны бодлого буруу явсны гор нь өнөөдөр гарч байна. Учир нь өчигдөр /2024.08.21/ Боловсролын сайд П.Наранбаяр 2024-2025 оны хичээлийн шинэ жилийн бэлтгэл ажилтай холбоотой асуудлаар мэдээлэл хийх үеэрээ “Боловсролын яамнаас багшийн сул орон тоог шийдвэрлэх, богино хугацаанд нөхөх чиглэлээр багш бус мэргэжилтэй их, дээд сургуулийг амжилттай төгссөн иргэдэд богино хугацааны сургалтаар багшлах эрх олгож, хөдөлмөрийн гэрээгээр ажиллуулахаар судалж журам гаргаж байна” гэж мэдэгдсэн.
Боловсролын сайд судалгааны үндэслэлгүй хариуцлагагүй мэдэгдэл хийж болохгүй. Багшийн мэргэжлийг богино хугацааны сургалтаар эзэмших боломжгүй.
Монгол Улсын ирээдүй хүүхэд багачуудын эрдэм боловсрол дээр тогтдог. Гэтэл одоо эрдэм боловсрол заах ардын багш нь "мэргэжлийн бус" хүн байна гэдэг бол ямар их хор хохирол авчрах нь ойлгомжтой.
Энэ асуудлыг Боловсролын яам анхаарч нэн яаралтай гаргасан шийдвэрээ цуцалж, багш бэлтгэх асуудалд анхаарлаа хандуулах нь зүйтэй.
Ерөнхий боловсролын сургуулиудад багшийн хомстол үүсэж байгаа гол шалтгаан нь ажлын ачаалал, эцэг эх, сурагчдаас үзүүлж буй дарамт шахалт, цалин нь амьдралд ахуйд нь хүрэлцэхгүй байгаагийн улмаас мэргэжлээрээ ажиллахаас татгалзаж худалдагч, гоо сайхны бүтээгдэхүүн борлуулдаг сүлжээнд элсэн орох, Өмнөд Солонгос улсад очиж хар ажил хийж байна.
Өнөөдөр Их дээд сургууль төгссөн мэргэжлийн багшаас илүүтэйгээр нийтийн тээврийн жолооч, тохижилт үйлчилгээний үйлчлэгч нар 3.5 сая төгрөгийн цалин авдаг болсон.
Тиймээс шинээр томилогдсон Боловсролын сайд П.Наранбаяр нэн тэргүүнд багш мэргэжлийн үнэлэмжийг бодлогын хэмжээнд дээшлүүлэх, нэг багшид ирж байгаа ажлын ачааллыг бууруулах, цалинг нь нэмэгдүүлэх ажлыг яаралтай хийх хэрэгтэй. Тэгэхгүй бол Монголын ирээдүй болсон хүүхэд багачууд хохирно гэдгийг л нэн тэргүүнд ухамсарламаар байгаа юм.
АМЛАЛТ.МН
