“Эрдэнэс Тавантолгой” ХК–ийн удирдлагууд өнөөдөр /2025.02.20/ 2024 оны үйл ажиллагааны тайлангаа сэтгүүлчдэд танилцууллаа.
Мэдээллийн эхэнд “Эрдэнэс Тавантолгой” ХК-ийн Санхүү, хөрөнгө оруулалтын газрын дарга Г.Гантулга 2024 оны санхүүгийн тайлангаа танилцуулсан юм.
Тэрээр ““Эрдэнэс Тавантолгой” ХК 2024 онд 30.4 сая тонн нүүрс олборлож, 29.6 сая тонн нүүрс борлуулж, 4.5 их наяд төгрөгийн цэвэр ашигтай ажилласан. Компанийн түүхэн дэх хамгийн өндөр борлуулалт хийж 10.2 их наяд төгрөгийн борлуулалтын орлоготой ажиллаж, Монгол Улсын төсөвт 3.5 их наяд төгрөгийн татвар төвлөрүүлэн ажилласан. 2024 оны цэвэр ашиг 4.5 их наяд төгрөг бөгөөд ногдол ашиг нь цэвэр ашгийн 86.6 хувийг эзэлж байна.
Компани 2024 оны цэвэр ашгаас нэгж хувьцаанд 326.5 төгрөг буюу нийт 3.9 их наяд төгрөгийн ногдол ашиг хуваарилахаар шийдвэрлэсэн. Үүнээс Иргэд, ААН-ийн ногдол ашигт 400.4 тэрбум төгрөгийг 2024 онд бэлэн мөнгөөр тараасан бол үлдсэн 637.7 тэрбум төгрөгийг 2025 онд хоёр хуваан бэлэн мөнгөөр олгохоор ажиллаж байна” гэв.
2024 онд “Эрдэнэс Тавантолгой” ХК Нүүрс баяжуулах үйлдвэр, Тавантолгойн нүүрс ачих логистикийн төв, Загийн усны хоолой зэрэг нэмүү өртөг шингээх үйлдвэрлэлийн төслүүдийг ашиглалтад оруулж, ордын нөөц баялгийг нэмэгдүүлэн урт хугацаанд үр ашигтай, тогтвортой үйл ажиллагаа явуулах боломжийг бүрдүүлэн ажиллажээ.
2023 оноос биржийн арилжааг эхлүүлж өнөөдрийг хүртэлх хугацаанд нийт 115 удаагийн биржийн арилжаа зохион байгуулж, 2.8 тэрбум ам.долларын үнэлгээтэй 25 сая тонн нүүрсийг биржээр борлуулаад байна. 2023 онд 9.8 сая тонн нүүрс биржээр арилжаалсан бол 2024 онд 15.3 сая тонн болгон нэмэгдүүлсэн. Энэ онд биржээр арилжаалах нүүрсний хэмжээг 50 хувьд хүргэх зорилт тавин ажиллаж байгаа гэдгийг компанийн удирдлагууд уулзалтын үеэр онцлон хэлсэн юм.
