Хэрэглэгчийн эрхийг хамгаалах тухай хуулийн шинэчилсэн найруулгын төсөл боловсруулах ажлын хэсгээс (2025.03.19) аж ахуйн нэгж, бизнес эрхлэгч, хэрэглэгч, иргэд, олон нийтийн дунд “Хэрэглэгч, түлш, эрчим хүч” уулзалт, хэлэлцүүлгийг Үндэсний худалдаа, аж үйлдвэрийн танхимд зохион байгууллаа.
УИХ-ын гишүүн, Хэрэглэгчийн эрхийг хамгаалах тухай хуулийн /Шинэчилсэн найруулга/-ийн төслийг боловсруулах үүрэг бүхий ажлын хэсгийн ахлагч Б.Бат-Эрдэнэ хэлэлцүүлгийг нээж үг хэлэв.
“УИХ-ын хаврын ээлжит чуулганы нээлтийн үеэр УИХ-ын дарга Д.Амарбаясгалан өрсөлдөөн, татвар, нийгмийн даатгал, хэрэглэгчийн асуудал энэ чуулганы гол сэдэв байна хэмээн онцолсон. Өнөөдөр бид түлш, эрчим хүчтэй холбоотой хэрэглэгчийн асуудлыг хөндөж байна. Хэрэглэгч гэж хэн бэ, эрх нь хаана зөрчигдөж байна вэ гэсэн асуудлын хүрээнд хууль, эрх зүйн зохицуулалтыг тодорхой болгох шаардлага бий болсон. Монополын эсрэг газар нэг талдаа өрсөлдөөний асуудал буюу аж ахуйн нэгж, байгууллагын асуудлыг хөнддөг, нөгөө талдаа хэрэглэгчийн эрхийг хамгаалж ажилладаг. Цаашид энэ зарчмыг үргэлжлүүлэх үү, үгүй юу гэдгийг хууль, эрх зүйн шинэчлэл дээр анхаарах ёстой” хэмээгээд өрсөлдөөн болон хэрэглэгчийн эрхийг хамгаалах асуудлыг тусад нь салгаж ойлгох зарчим, агуулга руу орох ёстой гэдгийг Б.Бат-Эрдэнэ гишүүн тодотголоо.
Уулзалт хэлэлцүүлгийн үеэр түлш, эрчим хүчний салбарын илтгэл, мэдээллийг сонсов.
Хэлэлцүүлэгт оролцсон иргэний нийгмийн байгууллагын төлөөлөл, иргэдийн зүгээс хэрэглэгчийн эрхийг хамгаалах асуудлыг сууриар нь харж, оновчтой шийдлийг хуулийн өөрчлөлтөд тусгах, хуулийн хэрэгжилтийг хянах байгууллагын үүрэг, хариуцлагыг тодорхой болгох талаар санал хэллээ.
АЖЛЫН АЛБА
