Ус цаг уур, орчны хяналт шинжилгээний салбарын удирдах ажилтны зөвлөгөөн өчигдөр /2025.04.08/ эхэллээ. Зөвлөгөөнд ЦУОШГ-ын хэлтсийн дарга нар, харьяа 4 байгууллага, 21 аймгийн УЦУОШТ-үүдийн дарга, холбогдох мэргэжилтнүүд оролцож өнгөрсөн хугацаанд хийгдсэн ажлуудын алдаа оноо, цаашид авч хэрэгжүүлэх арга хэмжээний талаар хэлэлцэж байна.
Зөвлөгөөний эхний өдрийн үйл ажиллагаанд Байгаль орчин, уур амьсгалын өөрчлөлтийн сайд С.Одонтуяа оролцож, үг хэллээ. Салбарын сайдын зүгээс уур амьсгалын өөрчлөлт эрчимжиж байгаа энэ үед Цаг уур, орчны шинжилгээний салбарт технологийн шинэчлэл хийх ажилд онцгойлон анхаарч байгаагаа дурьдлаа. Технологийн шинэчлэлийн хүрээнд 21 аймгийн агаарын чанарын автомат станцтай болгох, дэлхийн стандартад нийцсэн лабораторитой болгох, цаг агаарт жилийн турш зориудаар нөлөөлөх техникийн боломжийг бүрдүүлэх зэрэг ажлуудыг төлөвлөж байгаагаа дуулгалаа.
Үргэлжлүүлэн Ус цаг уур, орчны хяналт шинжилгээний салбарт хийх эрх зүйн шинэчлэлд албан хаагчдын нийгмийн баталгааг хангах өөрчлөлтүүдийг тусган хуулийн төслийг боловсруулан ажиллаж байгаа талаараа мэдээллээ. Мөн Ус, цаг уурын ажилчдын ажиллах нөхцөлийг хангах хүрээнд 20 гаруй өртөөний барилга, 100 гаруй харуулын байрыг байгальд ээлтэй технолигоор барихаар төлөвлөж байгаагаа дуулгаж хурлын үйл ажиллагаанд амжилт хүслээ.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!