Улс төрийн намын тухай хууль 2023 онд батлагдаж, 2024 оноос хэрэгжиж эхэлсэн билээ. Харин энэ онд Монголын бүх улс төрийн намууд үндсэн дүрэм, хөтөлбөрөө шинэчилж Улсын дээд шүүхэд бүртгүүлнэ.

Улс төрийн томоохон хүчин Ардчилсан нам бусад намаа манлайлалж, намын хөтөлбөр, үндсэн дүрмийн төслийн хэлэлцүүлгийг орон даяар дөрвөн бүст зэрэг эхлүүлсэн. Ардчилсан намын Үндсэн дүрэм, намын хөтөлбөрийг боловсруулах ажлын хэсэг тус тус гарч, өнгөрсөн гурван сарын хугацаанд энэхүү хэлэлцүүлгийн төслийг боловсруулжээ.

Харин одоо Монгол Улсын зүүн, баруун, төвийн бүс, нийслэлд дөрвөн ажлын хэсэг төслийн хэлэлцүүлэг өрнүүлээд тав дахь хоногтоо явж байна. Тухайлбал, өнөөдөр хангай, төвийн бүсийн найман аймгаар явж байгаа АН-ын Улс төр, намын байгуулалтын газрын дарга Д.Бат-Одоор ахлуулсан ажлын хэсэг Хөвсгөл аймгийн Мөрөн суманд төслийн хэлэлцүүлгийг зохион байгууллаа.

“Эв нэгдлээс институт” уриан дор өрнөж буй энэхүү хэлэлцүүлэгт Хөвсгөл аймгийн 23 сумын АН-ын гишүүн 200 гаруй хүн оролцов.

Өндөр дээд өвгийнхөө үеэс “Төр, үр хоёр минь мөнх оршиг” хэмээн тунхагласан үндэсний болоод шударга ёс, улс төрийн эрх, эрх чөлөөг эрхэмлэн дээдэлж ирсэн Хөвсгөлийнхөн өдгөө энэ хэлэлцүүлгээр намын анхан, дунд шатны байгууллагыг бэхжүүлэх, санхүүжилтийн асуудлыг нээлттэй, ил тод байлгах, эмэгтэйчүүдийн квотыг тодорхой болгох, түүнийгээ орон нутагт өгөх зэрэг саналыг хэлэв.

Мөн зарим оролцогч эдийн засгийн эрх, эрх чөлөөг эрхэмлэн дээдэлж, хувь хүн шударгаар олсон өмч хөрөнгөө хувьчлах, эзэмших, өвлүүлэх эрхээ эдлэх, энэ чиглэлээрх үзэл санааг тусгаж өгсөнд талархалтай хандаж буйгаа илэрхийлэв.