“Монголын Барилгын Материал Үйлдвэрлэгчдийн Холбоо”, “Блисс” компани Вьетнам улсын “Bestmix” корпорацтай хамтран “Барилгын материал ханган нийлүүлэгчдийн форум”-ыг өнөөдөр /2025.06.03/ зохион байгуулав.
“Монголын Барилгын материал ханган нийлүүлэгчдийн форум 2025”-д Вьетнам улсаас 12, ОХУ-3, БНХАУ-ын 3 компани оролцсон бол Монгол Улсаас барилгын материал ханган нийлүүлэгч 70 аж ахуйн нэгж байгууллагын төлөөлөл оролцсон юм.
“Монголын Барилгын материал ханган нийлүүлэгчдийн форум”-д дотоод, гадаадын үйлдвэрлэгчид, нийлүүлэгчид болон салбарын мэргэжилтнүүдийг хамруулж барилгын материал нийлүүлэгчид, үйлдвэрлэгчдийн уялдаа холбоог сайжруулах, хамтын ажиллагааг өргөжүүлэх, салбарын өнөөгийн байдал, ирээдүйн чиг хандлагыг хэлэлцсэнээрээ ач холбогдолтой болсон хэмээн форумд оролцогчид дүгнэж байна.
Тус форумын үеэр хэлэлцсэн гол асуудал бол Монгол Улсад гол тулгамдаж буй асуудлуудын нэг “Барилгын усны хамгаалалтыг хэрхэн хийх вэ?” сэдвийн хүрээнд өрнөв.
Мөн форумыг зохион байгуулагч “Блисс” компанийн зүгээс Монгол улсад барилгын угсралт хийдэг болон барилгын материал нийлүүлдэг компаниудад дэлхийн стандартад нийцсэн, олон улсад хүлээн зөвшөөрөгдсөн Вьетнам улсаас албан ёсоор импортоор оруулж ирж барилгын материалын зах зээлд нийлүүлдэг барилгын агааржуулалтын иж бүрэн систем, сантехник, барилгын гадна болон дотор засал чимэглэлд хэрэглэдэг будаг, барилгын суурь, дээврээс ус нэвчихээс хамгаалсан олон төрлийн бараа бүтээгдэхүүнээ танилцуулахаас гадна газар дээр туршилт хийж харууллаа.
“Bestmix” корпорацын Ерөнхий захирал Le Van Hai Trieu: Монгол Улсад анх удаа зохион байгуулагдаж буй барилгын материал ханган нийлүүлэгчдийн форумд оролцож байгаадаа баяртай байна. Форумд оролцож байгаа гол зорилго бол Монголын барилгын салбарын хөгжилд хувь нэмрээ оруулах юм. Мөн Монгол дахь албан ёсны төлөөлөгч болох “Блисс” ХХК-ийн Гүйцэтгэх захирал Б.Барсболдод төлөөлөгчийн газраа нээж байгаад нь талархал илэрхийлж, дэмжихээр ирсэн. Бас өөрсдийн хэрэглэгчдэдээ Монгол улсад үйл ажиллагаа явуулж буй барилгын материал ханган нийлүүлдэг компаниудыг танилцуулах, Монгол улсын хэрэглэгчдэд өөрсдийн бүтээгдэхүүнийг дэлгэрэнгүй танилцуулж, бүтээгдэхүүнээ Монгол Улсын зах зээлд нэвтрүүлэх зорилготой ирсэн” хэмээн хэлэв.
“Блисс” ХХК-ийн захирал Б.Барсболд:Нийгмийн хариуцлагын хүрээнд орон нутагт анхаарлаа хандуулан ажиллаж байна
Барилгын материал ханган нийлүүлэгчдийн форумыг санаачлагч Монголын Барилгын Материал Үйлдвэрлэгчдийн Холбооны УЗ-ийн гишүүн, “Блисс” ХХК-ийн Гүйцэтгэх захирал Б.Барсболдоос компанийн үйл ажиллагаа, нийгмийн хариуцлагын хүрээнд хийж хэрэгжүүлж буй ажлуудынх нь талаар тодрууллаа.
Тэрбээр “Манай компанийн хувьд барилгын агааржуулалт, сантехник, барилгын суурь, дээвэр, фасадны усны хамгаалалтын бараа бүтээгдэхүүн худалдан борлуулахаас гадна захиалгын дагуу угсарч өгдөг үйлчилгээ үзүүлдэг.
Өнөөдрийн байдлаар улсын хэмжээнд барилгын салбарт хэрэгжиж буй 10 гаруй төсөлтэй хамтран ажиллаж байна.
Манай компани болон “Bestmix” корпорацын цаашдын хамтын ажиллагааны зорилго нь импортын бараа бүтээгдэхүүнийг ханган нийлүүлэхээс илүүтэйгээр Монголын барилгын материал үйлдвэрлэгчтэй хамтран “Монголдоо барилгын материал үйлдвэрлэе” ажлын хүрээнд Вьетнамын “Bestmix” корпорацтай хамтран эхний үйлдвэрийн хамтран ажиллах гэрээг хийгээд байна.
Харин компанийн зүгээс нийгмийн хариуцлагын хүрээнд Төв аймгийн Алтанбулаг суманд байрлах ахмад настнуудын амьдардаг барилгын дээврийн засварын ажлыг хийж гүйцэтгэж байна.
Яагаад гэвэл орон нутгийн сургууль, дотуур байрнуудад ашиглалтын хугацаа хэтэрсний улмаас дээврээс ус алдах, хагарч цуурах тохиолдол их гардаг. Тиймээс бид нийгмийн хариуцлагын хүрээнд орон нутагт анхаарлаа хандуулан ажиллаж байна. Энэ зун гэхэд манай компани нийгмийн хариуцлагын хүрээнд Төв аймгийн сургуулиудын дотуур байрны дээврийг засварлах зорилготой ажлынхаа төлөвлөгөөндөө оруулан ажиллаж байгаа” гэдгийг хэлэв.
