МСНЭ, Хятадын ӨМӨЗО-ны ХМА-тай хамтран жил бүр хоёр улсын тодорхой тооны сэтгүүлчид Монгол, Хятад улсад зорчин хамтран мэдээ сурвалжилга бэлтгэдэг уламжлал тогтоод 7 дах жилийн нүүрийг үзэж байгаа билээ.
Тэгвэл энэ удаад Монголын хэвлэл мэдээллийн салбарын сэтгүүлчид БНХАУ-ын сэтгүүлчидтэй хамтран ӨМӨЗО-ны Тунляо, Улаан хад, Ухань зэрэг хотоор зочлон тус улсын бүтээн байгуулалт, аялал жуулчлал, хүнс үйлдвэрлэл, өв уламжлал, эрчимжсэн МАА, технологийн хөгжил, уламжлалт анагаах ухаан гэх зэрэг салбарын хөгжлийн талаар мэдээлэл бэлтгэн хүргэж байгаа юм.
Өнөөдөр Монгол Хятадын хамтарсан сурвалжлах багийн сэтгүүлчид Улаанхад хотын Баарин баруун хошууны “Бор ус” гацаан дах “Сайнаа” хонины эрчимжсэн МАА-н хоршооллын фермд очиж мэдээлэл авлаа.
“Сайнаа” хоршооллын тухайд нийт махны үүлдрийн 2000 хонь үржүүлдэг ферм бөгөөд нутгийн монгол эм хонийг африкийн хар толгойт хуцтай эрлийзжүүлж гаргаж авсан эм хонио дахин Англи үүлдрийн цэвэр хуцтай эрлийзжүүлэн махны чиглэлийн “Талын хар сувд” гэж нэрлэсэн хар хонь гаргаж авснаа танилцуулав.
Энэ хар хонины 4 сартай хурга нь амьдын жингээрээ 50 кг татдаг бөгөөд хамгийн удаандаа 10 сар болгоод нядлахад амьдын жингээрээ 100 кг жин татаж, үүний 50-55 хувь өөхгүй цэвэр махны гарцтай байдаг гэдгийг мэдээлэв.
Тус хоршоо “Талын хар сувд” хонины хургыг 2 сараас нь эхлэн өөрсдийн тариалангийн талбайд тарьж бэлтгэсэн эрдэнэшиш, ногоон тэжээлийн холимог тэжээлээр бордоход амьдын жин нь өдөрт дунджаар 500 гр-аар нэмэгддэг байна.
Мөн зуны улиралд тодорхой газарт хашаалсан хашаанд бэлчээн, бэлчээрийн өвс идүүлж, махыг нь илүү амтлаг болгодог гэнэ.
Дашрамд сонирхуулахад Өвөр монголд 1 кг хонины мах ойролцоогоор 65-70 юань буюу 60-70 мянган төгрөгийн үнэтэй байдаг бол амьд хонь жингээсээ хамаарч 0..85-1.7 сая төгрөгийн үнэ хүрдэг байна.
