Монгол Хятадын сэтгүүлчдийн сурвалжлах баг Улаанхад хотод байрладаг Хятад Монгол уламжлалт анагаах ухааны эмийн үйлдвэртэй танилцаж, мэдээ сурвалжилга бэлтгэлээ.

Тус үйлдвэрийн хувьд хятадын уламжлалт анагаахын эмийн үйлдвэр талаасаа 84-т, монгол уламжлалт эмийн үйлдвэр талаас 1-рт эрэмбэлэгддэг, Улаанхад болон Тунляо хотод 6 салбартай, үйлдвэрийн төв захиргаа нь эндээ байрладаг аж.

Тус үйлдвэрийн зочин хойморт Юань улсын ордны монгол эмч, анх удаа зохистой хоол хүнсээр дамжуулан хүнийг эмчлэх тухай бүтээл бичиж туурвисан Хүсэхүй оточ, Эмийн ургамлыг ялгаж таних, элдэв өвчинд хэрхэн таарах, хаана ургадаг тухай ном бичиж үлдээсэн монгол оточ Жамбалдорж нарын хөрөг баримлыг залсан байв.

Тус эмийн үйлдвэрийн захирал Хан Фүн Юүй “Монгол уламжлалт тан зүрх судас, дотор талын өвчлөлд илүү сайн гэдгийн онцлоод тус үйлдвэрт үйлдвэрлэсэн 1000 жилийн түүхтэй уушгины элдэв өвчнийг эдгээх танг” танилцуулав. Уламжлалт эмийн үйлдвэр жилд 100 гаруй шинэ эмийн патент авах хүсэлтийг Хятад улсын холбогдох газарт хандан гаргаж, 40 гаруй хувьд нь зөвшөөрөл авдаг байна.

Мөн тус үйлдвэр уламжлалт эм үйлдвэрлэдэг 500 гаруй газрыг эмийн ургамал, түүхий эдээр хангахын зэрэгцээ өөрсдөө 251 нэр төрлийн 3.5 тонн уламжлалт эм үйлдвэрлэдэг байна.
Энэ үйлдвэрт үйлдвэрлэдэг эмнээс онцгойлон Хятад улс даяар эмийн сангууд, эмнэлгүүдээр түгээмэл хэрэглэгддэг цус харвалт өвчний дараах саажилтыг бууруулж, тархины цусан хангамжийг сайжруулдаг Жачүн-13 эмийг танилцуулав.

Мөн үхэр адууны чөмгийг боловсруулж хүний биеийн тамирыг сэргээх амин дэм, гоо сайхны бүтээгдэхүүн үйлдвэрлэдэг гэдгийг хэлж Монгол Улсаас бод малын чөмөгний яс авах хүсэлтэй байдаг ч одоогоор энэ чиглэлээр манай улстай холбогдож чадаагүй байгаа, түүнчлэн эмийн үйлдвэрүүдтэй хамтран ажиллах хүсэлтэйгээ илэрхийлэв. Эмийн үйлдвэрийн хувьд бүрэн автоматчилагдсан, Хятад улсын 100 эмнэлэг, 25000 эмийн сангуудад бүтээгдэхүүнээ нийлүүлдэг дэргэдээ уламжлалт эм судлаач, хоол зүйч, технологич нараас бүрдсэн томоохон лаборатори ажиллуулдаг байна.