Барилгын тусгай зөвшөөрөл олгодог байгууллага атлаа барилгын инженергүй байгууллага байсан гэдэгт та итгэх үү. “Монголын Барилгын Үндэсний Ассоциаци” гэх төрийн бус байгууллагын удирдлагын багт саяханыг хүртэл барилгын инженер мэргэжилтэй хүн ажилладаггүй байж.

Тиймийн учир Монголын Барилгын Үндэсний Ассоциаци өнгөрөгч 6 дугаар сарын 20-ны өдөр ээлжит Их хурлаа хийж, 110 эрх бүхий гишүүн компаниудынхаа төлөөллийг оролцуулан хуралдаж, шинэчилсэн дүрмээ баталж, Удирдах зөвлөлийн 35 гишүүнээ шинэчлэн сонгож, сонгогдсон УЗ-ийн 35 гишүүн нь Ассиоцацийн Ерөнхийлөгчийг томилсон аж. Өөрөөр хэлбэл барилгын инженергүй удирдлагын багийг Их хурлаараа сольж мэргэжлийн барилгачид, инженерүүдийг багт шилжүүлжээ.

Гэтэл өмнөх баг нь байгууллагынхаа гэрчилгээ, тамга тэмдэгийг аваад “зугатчихсан” гэх.

Өмнө нь улс төрийн нам, төрийн байгууллага, төрийн болон орон нутгийн өмчит үйлдвэрийн газар, орон нутгийн иргэдийн хурлын байгууллагын зарим удирдлагууд шинээр томилогдсон дараагийн удирдлагадаа эрх мэдлээ шилжүүлэн өгөхгүй “тас гүрийж”, өрөө тасалгаагаа цоожлон, тамга тэмдэг, гэрчилгээгээ яваад “зугатдаг, ор сураггүй” алга болчихдог жишээ өмнө нь цөөнгүй гарч байсан.

Төрийн байгууллагын дарга нарын зарим нь төрийн шийдвэрээр албан тушаалаас хусагдангуутаа тамгаа аваад зугатаачихаж байсан удаатай. Ингэж зугатаахын цаад шалтгаан нь тамга хаана байна, тэнд эрх мэдэл дагалддагтай холбоотой гэж хэлж болох юм.

Тэгвэл ийм байдал өдгөө Төрийн бус байгууллага дээр гарах болжээ.

Монголын Барилгын Үндэсний Ассоциацийн ээлжит Их хурлаар сонгуулийн өрсөлдөөнд оролцон Ерөнхийлөгч болно гэж зорьж байсан өмнөх удирдлагууд болох Монголын Барилгын Үндэсний Ассоциацийн Ерөнхийлөгч асан Н.Баярсайхан, Гүйцэтгэх захирал Г.Батсүх нар удирдлагын багт орж чадаагүйдээ “балмагдан” тамгаа аваад явчихжээ.

Тэдний ингэж авирлах нь цаанаа шалтгаантай аж. Учир нь Монголын Барилгын Үндэсний Ассоциаци нь хэдэн жилийн өмнөөс Төрийн гүйцэтгэх зарим ажлыг Төрийн бус байгууллагад шилжүүлэх болсонтой холбоотойгоор Барилгын компаниудад тусгай зөвшөөрөл олгодог болсон байна. Энэ нь тамгаа авч зугатаагсад эрх мэдлээсээ салахыг эс хүссэнтэй холбоотой гэж ойлгож болохоор байгаа юм.

Тус ассиоцацийн Гүйцэтгэх захирал асан, тамгаа гэрчилгээ аваад “зугтагч” Г.Батсүх нь мөн “Монголын барилгын ханган нийлүүлэгчдийн зөвлөл”-ийн тэргүүний ажлыг давхар хашдаг нь ашиг сонирхолын зөрчил үүсдэг төдийгүй мань Г.Батсүх “манай ханган нийлүүлэгчийн зөвлөлийн гишүүн барилгын компаниудаас арматур, цемент авах юм бол Барилгын тусгай зөвшөөрлийг чинь гаргаж өгнө” гэх зэргээр Монголын Барилгын Үндэсний Ассоциацийн Гүйцэтгэх захирлын эрх мэдлийг хувьдаа ашигладаг, авлига, мөнгөний ашиг хонжоо хайдаг гэх яриа барилгачдын дунд гарсаар байгаа гэх.

Түүнчлэн фэйсбүүкээр дүүрэн “барилгын тусгай зөвшөөрөл хямд гаргаж өгнө” гэсэн зар мэдээллийн цаана Монголын Барилгын Үндэсний Ассоциацийн хуучин удирдлагууд байдаг гэж хардах хүмүүс ч байна. Мөн барилгын инженерүүдийн дипломын зургийг авч Барилгын тусгай зөвшөөрөл олгоход хүний нөөцийн материалд нь оруулж давхар бүртгүүлж будлиулдаг, тусгай зөвшөөрлийн материалыг өөрсдөө бэлдэж өгдөг, хятадын барилгын компаниудад тусгай зөвшөөрөл “зарж” байна гэх зэрэг хэл ам энэ байгууллагыг тойроод хөврөх аж.

Үүний цаана Монголын Барилгын Үндэсний Ассоциацийн бүрэн эрх нь дуусгавар болсон ч Н.Баярсайхан, Г.Батсүх нар эрх мэдлээ үргэлжүүлэн хэрэгжүүлж, байгууллагын гэрчилгээ, тамга тэмдэгийг хууль бусаар ашиглаж, элдэв арга хэмжээ зарлан, төрийн нэрийн өмнөөс бусдад үйлчилгээ үзүүлж байж болзошгүй нөхцөл байдлыг АТГ, ЭЦГ анхааралдаа аван шалгах хэрэгтэй.

Мөн Барилгын компаниуд, барилгын салбарт гадна дотнын хөрөнгө оруулагчид та бүхэн бүрэн эрх нь дууссан асссиоцацийн хуучин удирдлагууддаа эрхээ шилжүүлэн өгөх шаардлага тавьж, зохион байгуулж байгаа үйл ажиллагаанд нь оролцохгүй байх нь чухал.

Тусгай зөвшөөрөл, мөнгө төгрөг, эд хөрөнгөтэй холбоотой асуудал шийдвэрлэдэг байгууллагын тамга гэрчилгээг хууль ёсны эрх бүхий субъектүүдэд нь хүлээлгэн өгөлгүй ”авч зугтан” дур зоргоороо авирлах нь Эрүүгийн гэмт хэргийн шинжтэй, эрүүгийн хариуцлагад унах үйлдэл гэдгийг эрхбиш Н.Баярсайхан, Г.Батсүх нар ойлгож байгаа гэдэгт итгэж байна.

А.Галт

Amlalt.mn