Засгийн газар гаалийн байгууллагын хууль бус үйлдэлтэй тэмцэх зорилгоор 11-11 төвд мэдээлэл хүлээн авах тусгай шугамыг нээжээ. Иргэдийн мэдээллийг нууцалж, хууль хяналтын байгууллагад хүргүүлэх зохицуулалт хийгдсэн байна.
Засгийн газар нийгэмд шударга ёс тогтоох, баялгийн хулгай, авлига, албан тушаалын гэмт хэргийн эсрэг тэмцлийг эрчимжүүлэх зорилгоор тусгай ажлын хэсэг байгуулжээ. Гаалийн байгууллагад хийсэн хяналт, шалгалтын үр дүнд ноцтой зөрчил илэрсэн байна.
Ерөнхий сайд Г.Занданшатар өнгөрсөн баасан гарагт Улаанбаатар хотын Гаалийн газарт ажилласан юм.
Олон нийтийн хяналтыг сайжруулах, оролцоог нэмэгдүүлэх зорилгоор 2025 оны 12 дугаар сарын 8-ны өдрөөс эхлэн 11-11 төвд гаалийн байгууллагын хууль бус үйлдэл, ёс зүйгүй байдал, хүнд суртал, чирэгдлийн талаар баримт нотолгоотой мэдээлэл хүлээн авах тусгай шугам нээжээ. Иргэдийн мэдээллийн нууцлалыг хадгалж, эх сурвалжийг хуулийн дагуу хамгаалах аж.
Тус төвд ирсэн мэдээллийг өдөр бүр нэгтгэн Засгийн газрын Хэрэг эрхлэх газарт хүргүүлж, дүн шинжилгээ хийсний үндсэн дээр Ерөнхий сайдад танилцуулах юм. Шаардлагатай тохиолдолд баримт нотолгоотой мэдээллийн дагуу хууль хяналтын байгууллагыг ажиллуулах зохицуулалт хийгдсэн байна.
amlalt.mn
