БНСУ-ын Элчин сайдын яам 2025 оны 12 дугаар сарын 15-наас эхлэн виз мэдүүлэх хугацааг богиносгож, эмчилгээний визийг зөвхөн Солонгосын Виз Мэдүүлгийн Төвөөр дамжуулан олгохоор болсныг мэдэгдэв.
Бүгд Найрамдах Солонгос Улсын Элчин сайдын яамнаас 2025 оны арванхоёрдугаар сарын 15-наас эхлэн монгол иргэдийн БНСУ-ын виз мэдүүлэхтэй холбоотой дараах арга хэмжээг хэрэгжүүлэхээр мэдэгдэв.
Визний татгалзсан хариуг авснаас хойш дахин виз мэдүүлэх хугацааг зургаан сараас гурван сар болгон богиносгож, монгол иргэд татгалзсан өдрөөс хойш гурван сарын дараа дахин виз мэдүүлэх боломжтой боллоо.
Эмчилгээний (C-3-3) визийг зөвхөн “Солонгосын Виз Мэдүүлгийн Төв” (KVAC) хариуцан ажиллуулах бөгөөд цаашид энэ визийг бусад төлөөлөн гүйцэтгэх байгууллагад бус зөвхөн тус төвд мэдүүлэх шаардлагатай юм.
Мөн эмчилгээний визийг яаралтай, хурдан олгох “Шуурхай гарц” (Fast Track) үйлчилгээг шинээр нэвтрүүлж, холбогдох зөвлөгөөг KVAC-д авахыг зөвлөж байна.
Эмчилгээний виз мэдүүлэхэд шаардлагатай эмнэлгийн тодорхойлолтыг олгодог эмнэлгүүдийн тоог 9-өөс 11 болгож, Монгол Хьюндай Эмнэлэг, Агапе Христийн Эмнэлгийг шинээр нэмэв.
Виз мэдүүлэхэд шаардлагатай материалыг шинэчилсэн журам болон бусад дэлгэрэнгүй мэдээллийг KVAC-ын албан ёсны цахим хуудсуудаас авах боломжтой.
БНСУ-ын Элчин сайдын яам монгол иргэдийн визтэй холбоотой асуудлыг шийдвэрлэх, БНСУ-д зорчих нөхцөлийг сайжруулах чиглэлээр ажиллах болно гэж мэдэгдэв.
Amlalt.mn
