Монгол Улсын Хүний эрхийн Үндэсний Комиссын дарга Д.Сүнжид, Гомдол, хяналт шалгалтын хэлтсийн референт С.Мөнх-Эрдэнэ нар Шүүхийн шийдвэр гүйцэтгэх ерөнхий газрын харьяа Сургалт, хүмүүжлийн тусгай байгууллагад 2025 оны 12 дугаар сарын 16-ны өдөр ажиллалаа.
Иргэнээс ирүүлсэн гомдлын мөрөөр тус байгууллагын нөхцөл байдалд хяналт шалгалт хийж, өсвөр насны хүмүүжигчдийн хүүхдийн эрхийг хангах, тэдний эрүүл, аюулгүй орчинд амьдрах, сурч боловсрох нөхцөлийг сайжруулах шаардлагатай талаар 2025 оны 09 дүгээр сарын 02-ны өдөр Комиссын гишүүний Зөвлөмжийг Сургалт, хүмүүжлийн тусгай байгууллагад хүргүүлж байсан.
Комиссын гишүүний Зөвлөмжийн хэрэгжилтийн хүрээнд тус байгууллага нь өсвөр насны хүмүүжигчдийн эрүүл, аюулгүй орчинд амьдрах, сурч боловсрох эрхийг хангах зорилгоор зөөврийн сууцны төслийг эхлүүлжээ. Төслийг “ТИКА” Туркийн хамтын ажиллагаа, зохицуулалтын агентлагийн Улаанбаатар дахь Хөтөлбөр зохицуулалтын газрын дэмжлэгтэйгээр хэрэгжүүлж, зөөврийн сууцыг 2025 оны 12 дугаар сарын 03-ны өдөр ашиглалтад хүлээн авсан байна.
Сургалт, хүмүүжлийн тусгай байгууллагын цогцолбор барилга нь нийт 64 хүүхдийн багтаамжтайгаар зохион байгуулагдсан бөгөөд 4 улирлын зориулалттай 4х6 хэмжээтэй орон сууц 8 ширхэг, 4х11 хэмжээтэй хоол бэлтгэл, заал 1 ширхэг, 4х12 хэмжээтэй ариун цэврийн өрөө 1 ширхгээс бүрджээ.
Тус цогцолбор барилга 2026 оны 12 дугаар сард бүрэн ашиглалтад орсноор хүмүүжигчдийн амьдрах, сурч боловсрох орчин бодитоор сайжрах нөхцөл бүрэн бий болох юм.
Эх сурвалж: nhrcm.gov.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!