“Эрдэнэс Монгол” нэгдлийн Засгийн Газрын бүрэн эрхт төлөөлөгч /БЭТ/ Ж.Батзандан хэвлэлд хандаж мэдээлэл өгөв. Тэрбээр нэг талаас хийсэн ажлаа товч тайлагнасан бол нөгөө талаас БЭТ-ээр ажиллах хугацаанд тодорхой үр дүнд хүрснээ онцлон хэлэв.
Ж.Батзандан мэдээлэлдээ өнгөрсөн 8 сарын хугацаанд “Эрдэнэс Монгол” нэгдлийн БЭТ-ээр ажиллах хугацаандаа баялгийн санд хуримтлал бий болгох хүртээмжийг нэмэгдүүлэх чиглэлээр тодорхой ажлууд санаачлан үр дүнд хүрснээ мэдээлэв.
Түүнчлэн уул уурхайн стратегийн 16 ордны мэдээллийг танилцуулж, 2019 оны Үндсэн хуулийн өөрчлөлтөөр байгалийн баялагийн тодорхой хувийг ард түмэн түртэх боломжтой болсон ч харамсалтай нь энэ заалт төдийлөн хэрэгжихгүй байгааг дурьдлаа.
Тэрбээр Стратегийн орд болгон дээр тусгайлан одоо зузаан хавтас бүхий материал цуглуулж бүрдүүлснээ гаргаж үзүүлэв.
Өнгөрсөн хугацаанд “Эрдэнэс Монгол” нэгдэл нь стратегийн ордуудын тодорхой хувийг төр эзэмших, байгалийн баялгийг ард иргэдэд хүртээх тухай асуудлыг ярих бүрд Засгийн газрыг огцруулах, огцруулахаар санаархах явдал гарч, үүнээс үүдэн дээрх ажил тодорхой хэмжээнд гацаж саатаж ирсэн гээд Стратегийн ордуудын тодорхой хувийг яагаад монголын төр эзэмших ёстой тухайд тэрбээр хэлэхдээ “тухайн уурхай, орд газрын анхны хайгуулыг татвар төлөгчдийн мөнгөөр буюу ард түмний хөрөнгөөр хийсэн учраас ард түмэн тодорхой хувийг хүртэх учиртай” гэсэн юм.
Ж.Батзандан Эрдэнэтийн үйлдвэрийг зэсийн овоолгыг түшиглэн бий болсон Үүсмэл гурван ордны тухай мэдээлэл өгөв. Засгийн газраас “Эрдэнэс Монгол” нэгдлийн БЭТ-ийг томилохдоо эдгээр орд газруудын тодорхой хувийг ард түмний мэдэлд авчрахыг үүрэг болгосон. Энэ дагуу өнгөрсөн 8 сарын хугацаанд Эрдэнэтийн овоолгын үүсмэл гурван ордыг эзэмшдэг компаниудын удирдлагуудтай удаа дараа уулзаж, яриа хэлэлцээр хийсний үндсэн дээр тодорхой үр дүнд хүрч байгааг онцлов.
Ж.Батзандан “Энд нэг зүйлийг зориуд онцлон хэлэх нь зүйтэй, уул уурхайн баялагийн тодорхой хувийг төр, ард түмний мэдэлд авах асуудал яригдах бүрд Засгийн газрыг огцруулах асуудал гарч ирдэг нь санамсаргүй гэмээр үйлдэл биш юм” гэв.
Эрдэнэтийн зэсийн овоолгын хаягдал шороог боловсруулах зорилгоор байгуулагдсан анхны компанийн нэг болох “Эрдмин” ХХК бол Эрдэнэт үйлдвэрийн захирал агсан Ш.Отгонбаатар, Ерөнхийлөгч агсан П.Очирбат нарын анх байгуулсан компани, одоо ч үр хүүхдүүд нь эзэмшиж байгаа компани.
“Ачит ихт” компанийн тухайд Ерөнхийлөгч асан Ц.Элбэгдорж, түүний Тамгын газрын даргаар ажилаж байсан П.Цагаан нарын хамаарал бүхий компани гэж хэлж болно. Өдгөө П.Цагааны эхнэр, хоёр хүүгийн нэр дээр байдаг. Жилдээ 100 гаруй тэрбум төгрөг, сардаа 10 орчим тэрбум төгрөгийн ашигтай ажилладаг компани.
“Зэс эрдэнийн хувь” компанийн хувьд Эрдэнэтийн 10 гаруй мянган иргэд хувьцаа эзэмшдэг, харьцангуй эрүүл, саяхан байгуулагдсан компани боловч туршилтын нэрээр хууль зөрчөөд зэс олборлоод ашиг олоод байгаа боловч бидний тавьж буй санал, хэлэлцээрт хамгийн идэвхтэй оролцож, хамтран ажиллахаа илэрхийлж байгаа компани юм гэсэн мэдээллийг өглөө.
Эрдэнэтийн овоолгын үүсмэл гурван ордыг эзэмшиж байгаа дээрх гурван компанийн удирдлагуудтай удаа дараа уулзаж, хэлэлцээрийн ширээнд суусны үр дүнд тэдний зүгээс төрд 34 хувиа өгөх боломжтой гэдгээ хэлсэн ч БЭТ-ийн зүгээс тэдэнд хандан 34 хувь хангалтгүй, 50 хувиа ард түмнээ өгчих гэсэн саналыг хүргүүлээд байна. Энэ асаналыг оруулах бүрд БЭТ Ж.Батзанданг чөлөөлөх, огцруулах санал тавигддаг. Гэвч Ерөнхий сайд асан Л.Оюун-Эрдэнэ, Ерөнхий сайд Г.Занданшатар нар баялагийн сангаа арвижуулах, баян болгох саналаа боловсруулж Засгийн газарт оруулж батлуулах үүргийг өгсөн учраас би та бүхэнд мэдээлэл хүргэж байна. Эдгээр компанийн цаана томоохон улс төрчид, УИХ-ын гишүүд, дарга нарын томоохон эрх мэдэлтнүүд байгаа тодорхой.
Гэхдээ удахгүй шинэ оны эхний саруудад багтаж дээрх гурван компанийн ноогдол ашиг болон хуулиар заасан төрийн зэмшлийн 50%-иа авах шийдвэр ажил Засгийн газрын хэмжээнд шийдвэрлэгдээд явна гэдэгт итгэж байна.
Ц.Мөнх
Amlalt.mn
