Хүний эрхийн Үндэсний Комисс, Монголын Үйлдвэрчний Эвлэлийн Холбоотой иргэдийн хөдөлмөрлөх, эвлэлдэн нэгдэх эрхийг хамгаалах, зөрчигдөхөөс урьдчилан сэргийлэх, хүний эрхийн боловсрол, мэдлэг ойлголтыг нэмэгдүүлэх зорилго бүхий хамтран ажиллах санамж бичиг (2025.12.23) байгууллаа.

Санамж бичгийн хүрээнд талууд аймаг, нийслэлийн Үйлдвэрчний эвлэлийн холбооны гишүүдийг хүний эрхийн сургагч багшаар бэлтгэх, тэднээр дамжуулан хүний эрхийн боловсролыг орон нутагт үе шаттай түгээх, иргэдийн хөдөлмөрлөх, эвлэлдэн нэгдэх эрхийг дэмжих чиглэлээр өдөрлөг, сурталчилгаа, нөлөөллийн арга хэмжээг хамтран зохион байгуулах, хамтын ажиллагааны ололт, үр дүнг хэвлэл мэдээлэл болон цахим сувгаар дамжуулан олон нийтэд мэдээлэхээр тохиролцов.

Түүнчлэн олон улсын хамтын ажиллагааны хүрээнд гадаад, дотоодын сайн туршлагыг судлах, мэргэжил дээшлүүлэх сургалт, семинарт талуудын албан хаагч, идэвхтэн, сонгуультнуудыг хамруулах, хамтарсан төсөл, хөтөлбөр хэрэгжүүлэх боломжийг бүрдүүлэхээр тусгасан.

Мөн ажлын байр, хөдөлмөрийн харилцаанд үүсэж болзошгүй дарамт, хүчирхийлэл, бэлгийн дарамтаас урьдчилан сэргийлэх, зөрчлийг таслан зогсоох, холбогдох гомдол, маргааныг урьдчилан шийдвэрлэх, хууль тогтоомжийг зохих журмын дагуу хэрэгжүүлэхэд мэргэжил, арга зүйн дэмжлэг үзүүлэхийн зэрэгцээ Хүний хувийн мэдээлэл хамгаалах тухай хуульд нийцүүлэн мэдээлэл цуглуулах, боловсруулах, ашиглах журмыг мөрдүүлэхэд анхаарч ажиллана.

Энэхүү санамж бичиг нь гурван жилийн хугацаанд хүчин төгөлдөр хэрэгжих бөгөөд талуудын хамтын ажиллагаа нь иргэдийн хөдөлмөрлөх, эвлэлдэн нэгдэх эрхийг бодитойгоор хангах, хүний эрхийн зөрчлөөс урьдчилан сэргийлэх, хүний эрхийн боловсрол, соёлыг төлөвшүүлэхэд чухал ач холбогдолтой юм.

Ugluu.mn