Сонгуулийн ерөнхий хороо “Транспэрэнси интернэшнл-Монгол” ТББ-тай хамтран ажиллах Санамж бичиг байгууллаа. Хамтран ажиллах Санамж бичигт Сонгуулийн ерөнхий хорооны Тамгын газрын дарга Д.Бат-Эрдэнэ, “Транспэрэнси интернэшнл-Монгол” ТББ-ын Гүйцэтгэх захирал Э.Мөнхжаргал нар өнөөдөр (2026.01.19) гарын үсэг зурж баталгаажуулав.
Сонгуулийн ерөнхий хорооны Тамгын газрын дарга Д.Бат-Эрдэнэ “Монгол Улсын Үндсэн хуульд оруулсан нэмэлт, өөрчлөлт болон түүний үзэл баримтлалын дагуу батлагдсан Улс төрийн намын тухай хуулийн хэрэгжилтийг хангахад тус Хорооны хувьд хуулиар хүлээсэн чиг үүргийг хэрэгжүүлэхээс гадна үзэл баримтлалын хувьд зөв ойлгож, улс төрийн намыг бодлогын институт болж хөгжиж, бэхжихэд нь дэмжлэг үзүүлж хамтран ажиллах нь чухал юм.
Ил тод байдал бол энэ хуулийн үзэл баримтлалын гол шаардлагын нэг нь мөн тул улс төрийн намын үйл ажиллагааны болон санхүүгийн ил тод байдал бусад улс орнуудтай харьцуулахад ямар түвшинд байгаа суурь үзүүлэлтийг тодорхойлон үнэлж, цаашид аль чиглэлд илүү анхаарч, улс төрийн намд зөвлөмж өгч ажиллахаа нарийвчлан тодорхойлох шаардлагатай гэж үзэж байгаа.
Иймд улс төрийн намын үйл ажиллагааны болон санхүүгийн ил тод байдлын суурь түвшинг олон улсын хөндлөнгийн байгууллагаас тогтоосон шалгуур үзүүлэлтийн дагуу тодорхойлж, түүний мөрөөр олон талт үйл ажиллагааг зохион байгуулах нь хуулийн хэрэгжилтийг хангах болон авлигаас урьдчилан сэргийлэхэд чухал хувь нэмэр оруулна.” гэж онцоллоо.
“Транспэрэнси интернэшнл-Монгол” ТББ-ын Гүйцэтгэх захирал Э.Мөнхжаргал улс төрийн намын ил тод байдлыг хангах чиглэлээр Монгол Улс Нээлттэй засгийн түншлэлийн Сорилтод нэгдэн ажиллаж байгаа, “Улс төрийн нам, сонгуульд нэр дэвшигчид болон сонгуулийн кампанит ажлын санхүүжилтийн ил тод байдлыг нэмэгдүүлэх замаар авлигаас урьдчилан сэргийлэх, түүнтэй тэмцэх тухай” НҮБ-ын тогтоолыг батлуулсан зэрэг амжилтыг тодотгоод “Транспэрэнси интернэшнл" байгууллага улс орнуудыг хооронд нь харьцуулах байдлаар үнэлгээний шалгуур үзүүлэлтээ тодорхойлдог. Энэ шалгуур үзүүлэлтийг нэг улсын түвшинд ашиглах боломжгүй.
Харин Сонгуулийн ерөнхий хороотой хийсэн хэд, хэдэн удаагийн уулзалтын үр дүнд Монгол Улсад мөрдөж байгаа хууль тогтоомж, тогтолцооны хүрээнд ашиглах аргачлалыг боловсруулж байна. Монгол Улсад ашиглах энэ аргачлал нь бүс нутгийн хэмжээнд сайн туршлага болох боломжтой” гэлээ.
Улс төрийн намын ил тод байдлыг хангах шалгуур үзүүлэлтийг боловсруулж, дүгнэхээс гадна үйл ажиллагаа болон санхүүжилтийн ил тод байдлыг сайжруулах, намыг институцийн хувьд хөгжүүлэх, чадавхжуулах замаар авлигаас урьдчилан сэргийлэх зорилгоор уг Санамж бичгийг байгуулж байгаа юм.
Хамтын ажиллагааны хүрээнд “Транспэрэнси интернэшнл-Монгол” байгууллага намуудын үйл ажиллагаа болон санхүүгийн ил тод байдалд жил бүр хөндлөнгийн үнэлгээ, мониторинг хийх аргачлалыг боловсруулах, үнэлгээ хийх бөгөөд үнэлгээний үр дүнд тулгуурлан Сонгуулийн ерөнхий хороонд болон улс төрийн намуудад мэргэжил, арга зүйн зөвлөмж өгнө. Түүнчлэн улс төрийн намуудыг институцийн хувьд хөгжүүлэх, ил тод нээлттэй байдлыг хангах замаар авлигаас урьдчилан сэргийлэхэд чиглэсэн сургалт, хэлэлцүүлэг зохион байгуулж, хүний нөөцийг чадавхжуулах, энэ талаарх олон нийтийн мэдлэг ойлголтыг нэмэгдүүлэх, хууль тогтоомжийг сурталчлан таниулахад хамтран ажиллана.
Авлигын эсрэг НҮБ-ын конвенцын хүрээнд баталсан “Улс төрийн нам, сонгуульд нэр дэвшигчид болон сонгуулийн кампанит ажлын санхүүжилтийн ил тод байдлыг нэмэгдүүлэх замаар авлигаас урьдчилан сэргийлэх, түүнтэй тэмцэх тухай” тогтоолын хэрэгжилтийг хангахад дэмжлэг үзүүлэхэд чиглэсэн үйл ажиллагааг мөн хамтран хэрэгжүүлэхээр талууд тохирсон.
Хамтран ажиллах Санамж бичигт гарын үсэг зураг ажиллагаанд Сонгуулийн ерөнхий хорооны гишүүн, Улс төрийн намын мэдээлэл арга зүйн газрын дарга Д.Баяндүүрэн, Улс төрийн намын санхүүжилт, хяналтын газрын дарга Н.Булгамаа, “Транспэрэнси интернэшнл-Монгол” ТББ-ын ажилтан Б.Золжаргал нар оролцов.
Эх сурвалж: m-election.mn
