Хүүхэд багачуудын эрүүл мэнд, өсөлт хөгжилд зориулсан “Сүүн дархлаа” хөтөлбөр хэрэгжиж эхэлж буйтай холбогдуулан Ерөнхий сайд Г.Занданшатар өнөөдөр “Эрдмийн ундраа” сургуулиар зочлов.
Тус хөтөлбөр энэ сарын 26-ны өдрөөс хэрэгжиж, нийслэлийн сургуулиудын 1-5 дугаар ангийн сурагчид хамрагдаж байгаа юм. Сурагчдад үдийн хоолноос гадна долоо хоногт гурван удаа сүү өгөх аж. Тус хөтөлбөрийг нийслэл, дүүрэг, эцэг эхийн санхүүжилтээр зохион байгуулж буй.
Ерөнхий сайд Г.Занданшатар монгол хүүхэд бүр эх орондоо үйлдвэрлэсэн сүү ууж буйд баяртай байгаагаа илэрхийлээд, үндэсний үйлдвэрлэгчид бүтээгдэхүүнийхээ амт чанарт анхаарч, сурагчдад чанартай сүү өгнө гэдэгт итгэлтэй байна гэлээ. Мөн хоолоо сайн идэж, сүүгээ тогтмол уухыг хүүхдүүдэд зөвлөөд, эрдэм боловсролдоо шамдан суралцаж, эх орондоо ихийг бүтээгч иргэд болохыг хүсэн ерөөлөө.
Дэлхийн улс орнуудын туршлагаас үзвэл, Япон Улс 1959 онд, Бүгд Найрамдах Солонгос Улс 1981 онд, Бүгд Найрамдах Хятад Ард Улс 2005 оноос сурагчдыг сүү хөтөлбөрт хамруулах болсон байна. Энэхүү хөтөлбөр хэрэгжсэнээр хүүхдийн өсөлт хөгжил сайжирч, бие махбодын дархлаа сайжирч, сурах идэвх нэмэгддэг. Мөн хүний биед шаардлагатай амин болон тосны хүчил, аминдэм, шимт бодисын хэмжээ өсөж, шүдний өвчлөл буурдаг байна. Үүний зэрэгцээ төр хувийн хэвшлийн хамтын ажиллагаа сайжирч, үндэсний аж ахуйн нэгжүүдэд бодит дэмжлэг болох зэрэг ач холбогдолтой юм.
Ерөнхий сайд Г.Занданшатар тус сургуульд суралцаж, 1987 онд төгсжээ. Ерөнхий сайд “Эрдмийн ундраа” цогцолбор сургуулийн сурагчид, багш, удирдлага, хамт олонд эрдмийн үйлсэд нь амжилт хүслээ.
Эх сурвалж: Ulaanbaatar.mn
