Тухайлбал, Нийслэлийн ерөнхий боловсролын 29 дүгээр сургууль, 116 дугаар сургуульд хийсэн хяналт шалгалтаар сурагчдын суралцах орчин, дотуур байр, хоол хүнс, аюулгүй байдалтай холбоотой зөрчлүүдийг илрүүлж, холбогдох албан тушаалтнуудад Комиссын гишүүний 2023.05.12-ны өдрийн №04/12, 2023.04.06-ны өдрийн №04/08 шаардлагуудыг хүргүүлэн зөрчлийг арилгууллаа.

Үүнд:

Сургуулийн орчинд харааны бэрхшээлтэй, ялангуяа тэг хараатай сурагч саадгүй зорчих, суралцах орчин хангалтгүй байсныг илрүүлж, шат, бариул, гэрлийн унтраалга, цонх, өрөө, тасалгаа, коридор, хаалганы тэмдэглэгээг хийлгэв.

Дотуур байрны өрөөний хаалгыг хүүхэд унтах үед хаадаггүй байсан зөрчлийг шалгалтаар илрүүлж, уг зөрчлийг арилгуулсан. Бие засах өрөөнд хүүхэд сууж бие засах үед барих бариул суурилуулсан.

Усанд орох өрөө, шүршүүрт хүүхэд халтирахаас урьдчилан сэргийлэх бариул хийлгэв.

Хяналт шалгалтын явцад сурагчдын хоол, хүнсний чанар, хүртээмж хангалтгүй байгааг тогтоосон тул хоолны орц, норм, илчлэгийг шалгаж, сурагчдын өндөр, жингийн судалгаа хийж, хоолны цэсийг батлан мөрдүүлж зөрчлийг арилгууллаа.

Захирлын өрөөнд байрлаж байсан камерын үндсэн дэлгэцийг өөр өрөөнд шилжүүлсэн.

Хичээлийн байрны шатанд өгсөх, уруудах резинэн тэмдэглэгээ хийлгэлээ.

Ханын самбарт мэдээллийг кирилл болон брайль үсгээр байршууллаа.

Сургалтын үйл ажиллагаатай холбоотой асуудлаар дунд, ахлах ангийн сурагчдын санал хүсэлт, багш ажилчдын санал болон камерын хяналтыг судалж, 3 багшид тушаалаар сануулах, 5 багшид хаалттай сануулга өгч, ажил сайжруулах хугацаатай үүрэг даалгавар өгүүлэв.

Багш, ажилтнуудын дохионы хэлний чадварт үнэлгээ өгч, чадварыг сайжруулах, идэвхжүүлэх арга хэмжээг зохион байгуулсан.

Сургуулийн заал, хөлбөмбөг, сагсны талбай, чийрэгжүүлэх тэнхим, компьютерийн өрөөнүүдийг хуваарийн дагуу ашиглуулж, сурагчид чөлөөт цагаа зөв боловсон өнгөрүүлэх боломжийг бүрдүүллээ.