Ням-Осорын Учрал шинэ Засгийн газраа бүрдүүлэх чухал үедээ нэг зүйлийг онцлон хэлсэн нь анхаарал татаж байна. Тэрбээр цаг үеийн нөхцөл байдалтай уялдуулан Засгийн газар хурдтай, шуурхай ажиллана гэдгээ илэрхийлсэн.
Гэвч бодит байдал дээр Засгийн газар солигдох бүрт сайд нар дагалдан солигдож, түүнийг дагасан улс төрийн томилгоонууд өрнөдөг. Шинэ баг бүрэлдэхэд дор хаяж 2-3 сар ажлын уялдаа, туршлага суух хугацаа шаардагддаг нь төрийн ажлыг удаашруулдаг бичигдээгүй хууль шахуу зүйл болоод байна.
Ийм нөхцөлд “шинэчлэл” нэрийн дор бүхнийг шинээр эхлүүлэх бус, харин үр дүн гаргаж эхэлсэн, салбараа мэддэг сайд нарыг улируулан ажиллуулах нь илүү бодит шийдэл юм.
Тухайлбал, Хассуурийн Ганхуягийн хариуцаж буй салбарт онцгой ач холбогдолтой ажлууд төвлөрдөг. Үүнд үндэсний баяр наадам, “Дэлхийн адууны өдөр” зэрэг олон нийтийн томоохон арга хэмжээ, мөн газар тариалан, зуд гамшгийн нөхцөл байдал зэрэг улирлын онцлогтой бодлогын ажлууд багтдаг. Ийм салбарт туршлагатай удирдлагыг солих нь эрсдэл дагуулж болзошгүй.
Үүнээс гадна эрхэлсэн ажилдаа тодорхой амжилт гарган ажиллж байгаа:
- Энхбаярын Батшугар (Цахим хөгжил, инноваци)
- Телиуханы Аубакир (Гэр бүл, хөдөлмөр, нийгмийн хамгаалал)
- Эрдэнэбатын Бат-Амгалан (Хот байгуулалт, орон сууцжуулалт)
зэрэг сайд нарыг улируулан ажиллуулах нь салбарын бодлого тасалдахгүй, эхэлсэн ажлууд саарахгүй байх бодит боломжийг бүрдүүлнэ.
Шинэ сайд томилох бүрт “шинэ баг”, “шинэ бодлого” гэх нэрийн дор хугацаа алдах нь өнөөгийн эдийн засаг, нийгмийн эмзэг үед тийм ч оновчтой шийдэл биш. Харин туршлага, залгамж чанарыг хадгалах нь илүү үр ашигтай гарц юм.
Иймээс шинэ Ерөнхий сайд Н.Учралын хувьд улс төрийн тохирооноос илүү бодит үр дүнг чухалчилж, зарим сайд нараа улируулан ажиллуулах нь түүний Засгийн газрын амжилтын нэг гол түлхүүр байж болох юм.
Ц.Мөнх
Amlalt.mn
