“Төсвийн хөрөнгө оруулалтын удирдлагын тухай” анхдагч хуулийн төслийн хэлэлцүүлгийг 2026 оны 4 дүгээр сарын 6-ны өдөр төсвийн хөрөнгө оруулалтын төслүүдийг хэрэгжүүлэгч аж ахуйн нэгжүүдийн төлөөллийг хамруулан зохион байгууллаа.

Монгол Улсын эдийн засгийн тогтвортой өсөлт, нийгмийн хөгжлийн суурь болсон төсвийн хөрөнгө оруулалтын бодлого, түүний удирдлагыг шинэ шатанд гаргах зорилгоор боловсруулсан уг хуулийн төслийн хэлэлцүүлгийг Сангийн яамны Төрийн нарийн бичгийн дарга М.Баярмагнай нээж үг хэлэв. Тэрбээр сүүлийн жилүүдэд төслийн хэрэгжилт удаашрах, төсөвт өртөг нэмэгдэх, зарим тохиолдолд үр өгөөж хангалтгүй байх зэрэг асуудал гарч буйг онцлон тэмдэглэсэн. Энэ нь хөрөнгө оруулалтын төлөвлөлт, сонгон шалгаруулалт, хэрэгжилт, хяналт, тайлагналтын уялдаа сул байгаатай холбоотой бөгөөд эдгээр харилцааг бүхэлд нь зохицуулах нэгдмэл хууль, эрх зүйн орчныг бүрдүүлэх шаардлага үүссэнийг дурдлаа.

Мөн уг хуулийн төслийн талаар Сангийн яамнаас танилцуулж, төслийг боловсруулах үндэслэл, хэрэгцээ шаардлага, өнөөгийн нөхцөл байдал, хууль батлагдсанаар бий болох үр дүн, өгөөжийн талаар дэлгэрэнгүй мэдээлэл өгсөн.

Тухайлбал, хуулийн төсөл нь хувийн хэвшлийг илүү хариуцлагатай, чадварт суурилсан, өрсөлдөөнт орчинд ажиллах нөхцөлөөр хангахын зэрэгцээ тэдний бодит оролцоо, хувь нэмрийг үнэлж, дэмжих эрх зүйн суурийг бүрдүүлэхэд чиглэж байна. Иймд хувийн хэвшлийн идэвхтэй оролцоо, бодит туршлага, санал зөвлөмж нь энэхүү хуулийн төслийн чанар, цаашдын хэрэгжилтийн үр дүнд чухал нөлөө үзүүлэх ач холбогдолтой юм.