“Номын соёлт ертөнц” төрийн бус байгууллагын дэргэдэх “Либро Сувд” агентлаг монгол зохиолчдынхоо бүтээлийг БНСУ, Казахстан, Энэтхэг, АНУ-д болсон олон улсын номын яармагт танилцуулсан. Үүнтэй холбоотой 39 дэх удаагийн “Номын баяр”-ын “Номын грант” шагналд нэр дэвших бүтээлийн өрсөлдөөн улам нэмэгджээ.

Өчигдөр өндөрлөсөн “Номын баяр”-ын үеэр уламжлал ёсоор НЗДТГ-ын нэрэмжит “Улаанбаатар грант” шагналыг гардуулав. Энэхүү нэр хүндтэй шагналд дөрвөн бүтээл нэр дэвшсэн бөгөөд бүгдийг нь англи хэлээр хэвлүүлэхээс гадна удахгүй хэвлэх бүтээл байжээ. Тодруулбал, зураач О.Золбоотөгөлдөрийн “Зүүд урлаач” зурагт ном, мэдээллийн Эргэлт.мн сайтын “Сүүлчийн нүүдэлчид” сэтгүүл зүйн бүтээл, зураач, зохиолч Э.Мишээлийн “Үр минь чамайг хүлээж байна” зурагт ном, Соёлын гавьяат зүтгэлтэн “Чингис хаан” одонт, зохиолч, яруу найрагч Г.Мэнд-Ооёогийн “Оройн ганц мод” роман нэр дэвшсэн байна.

Улмаар Э.Мишээлийн “Үр минь чамайг хүлээж байна” зурагт ном “Улаанбаатар грант” хүртэж, таван сая төгрөг гарджээ. Энэхүү номд дөнгөж төрсөн хүүхдийн өмнө энэ хорвоогийн юм бүхэн шинээр нээгдэхээ хүлээж байдаг тухай өгүүлнэ. Шинэ хүнээ өлгийдөн авсан ээж, аавуудад уншиж дууссаны дараа сайхан мэдрэмж төрүүлэхүйц бүтээл гэдгийг зохиогч нь онцолсон байдаг. Хүүхэд өсөж том болохын хэрээр улам хөгжиж буй үгсийн санд нь уул, гол, од, гэр, хот, ном, хүмүүс, амьтан гэх мэт өдөр тутам хэрэглэдэг нэр үгсийг танилцуулах зорилгоор шигтгэсэн байна. Мөн амьгүй зүйлсээс амьтай зүйлс хүртэлх энгийн нэршлүүдийг таниулж өгөх зорилготой ажээ.

Тус ном энэ онд Италийн Болонья хотноо зохион байгуулдаг хүүхдийн номын үзэсгэлэнгээс жил бүр тодруулдаг “The BRAW Amazing Bookshelf” жагсаалтад багтсан аж. Уг номыг “Гэрэн Паблишинг” хэвлэлийн газар 2024 онд эрхлэн гаргажээ. “Миний чиний бидний гэр”, “Сургуульд юу болдог вэ”, “Залхуу Никийн адал явдал”, “Үр минь чамайг хүлээж байна” гэсэн дөрвөн ном номын бяцхан уншигчдын хүртээл болгосон байна.

Эх сурвалж: Montsame.mn