Баянгол дүүргийн Иргэдийн Төлөөлөгчдийн Хурлын дарга П.Өлзийнаран, тус дүүргийн 9 дүгээр хорооны Засаг дарга Т.Чимгээ, 21 дүгээр хорооны Засаг дарга Д. Дамдинсүрэннар Баянгол дүүргийн Ерөнхий боловсролын 146 дугаар сургуулийн хамтарсан багийн үйл ажиллагаа болон сургалт, хүмүүжлийн өдөрлөгт оролцож, хэрэгжүүлж буй ажлын талаар мэдээлэл сонслоо.

Тус сургууль нь 640 хүүхдийн хүчин чадалтай боловч өнөөдөр хоёр дахин олон сурагчийг сургаж, боловсролын үйлчилгээ үзүүлж байна. Мөн хөгжлийн бэрхшээлтэй 18 хүүхэд суралцаж байгаа бөгөөд тэдний суралцах эрхийг бүрэн хангах, үе тэнгийнхний дэмжлэгийг нэмэгдүүлэх, эцэг эх, асран хамгаалагчдын оролцоог идэвхжүүлэх чиглэлээр сургалтын баг тогтмол ажиллаж байна.

Хүүхэд хамгаалал, хүүхдийн эрхийн чиглэлээр тус сургууль:

• Сэтгэл зүйн бүлгийн болон ганцаарчилсан уулзалтуудыг тогтмол зохион байгуулах,

• Эрсдэлийн үнэлгээ хийх,

• Урьдчилан сэргийлэх арга хэмжээг хэрэгжүүлэх,

• Эцэг эх, асран хамгаалагчдад зөвлөгөө мэдээлэл өгөх зэрэг ажлыг тасралтгүй зохион байгуулж,

• Түүнчлэн эцэг эх, асран хамгаалагчдын өргөтгөсөн хурлыг 350 гаруй эцэг эхийг хамруулан хамтарсан багийн үйл ажиллагаанд дэмжлэг үзүүлэх, хүүхдийн сургалт хүмүүжилд гэр бүлийн оролцооны ач холбогдлыг таниулахад анхаарч ажиллажээ.

Мөн үе шаттай аян, нөлөөллийн арга хэмжээнүүдийг зохион байгуулснаар "СУРАГЧИД ӨӨРСДӨӨ МАНЛАЙЛАЛ ҮЗҮҮЛЖ", үе тэнгийн дээрэлхэлт, ялгаварлан гадуурхалтыг бууруулан, эерэг хандлагатай орчин бүрдүүлэхэд бодит үр дүн гарсан байна.

Сургуулийн орчинд санал хүсэлтийн хайрцаг байршуулснаар багш, сурагчдын харилцаа, хандлага, дээрэлхэлт, ялгаварлан гадуурхалт, хүчирхийллийн шинж тэмдгийн талаарх мэдээллийг шуурхай хүлээн авч, тухай бүрд нь шийдвэрлэх боломж бүрджээ.

Ийнхүү Баянгол дүүргийн Ерөнхий боловсролын 146 дугаар сургуулийн захиргаа удирдлага, багш сурган хүмүүжүүлэгчдийн баг үр дүнтэй ажиллагаагаар хүүхэд бүрийг АЮУЛГҮЙ, ЭЕРЭГ, ТЭГШ, ХҮРТЭЭМЖТЭЙ ОРЧИНД суралцах нөхцөлийг бүрдүүлэн ажиллаж байна.

Эх сурвалж: Баянгол Дүүрэг ИТХАА