Европын холбооны гишүүн улсуудаас Монгол Улсад суугаа болон хавсран суугаа Элчин сайд нар Цөлжилттэй тэмцэх НҮБ-ын конвенцын Талуудын 17 дугаар бага хурал (СОР17)-ыг дэмжин ажиллахаа илэрхийлжээ.

Элчин сайд нарын энэ удаагийн уулзалтад БОУАӨ-ын сайд, СОР17 хурлыг зохион байгуулах Үндэсний хорооны дарга Ц.Сандаг-Очир оролцож, мэдээлэл өгч санал солилцсон байна. Тэрбээр тус хурлыг зохион байгуулахад дэмжлэг, туслалцаа үзүүлж буй Элчин сайд, холбогдох албаны төлөөлөлд талархал илэрхийлж, Европын Холбоо, түүний гишүүн орнууд нь Монгол Улсын тогтвортой хөгжил, ногоон шилжилт, уур амьсгалын өөрчлөлтийн эсрэг хамтын ажиллагааны чухал түнш байсаар ирснийг онцолсныг БОУАӨЯ мэдээлэв.

Засгийн газар Улаанбаатар хотноо энэ оны наймдугаар сарын 17-28-нд болох СОР17 бага хурлыг үр дүнтэй зохион байгуулахад идэвх санаачилгатай ажиллаж, талуудын хамтарсан уулзалтыг үе шаттай зохион байгуулж байгаа билээ. Мөн байгаль орчны эрх зүйн орчноо шинэчлэх ажлыг эхлүүлсэн Талуудын 17 дугаар бага хурал нь газар, ус, бэлчээр, ой, уур амьсгал, хүнсний тогтолцоо, малчдын амьжиргаа, хөрөнгө оруулалт, шинжлэх ухаан, залуусын оролцоог нэгтгэсэн шинэ манлайлал үзүүлэх боломж гэж үзэж байгаа.

Дээрх уулзалт нь талуудын хамтын ажиллагааг бодит үр дүн, хөрөнгө оруулалт, бодлогын шинэчлэл, ирээдүйн хамтын манлайлал руу чиглүүлэх чухал боломж юм.

Элчин сайд нар нийт газар нутгийн 77 орчим хувь нь ямар нэг байдлаар цөлжилтөд өртсөн Монгол Улсад энэ хурлыг амжилттай зохион байгуулах нь цөлжилттэй тэмцэхэд бүх нийтээрээ хүчээ нэгтгэж буйгаа дэлхий нийтэд харуулах боломж юм гэдгийг тодотгоод, СОР17-г зохион байгуулахад дэмжлэг үзүүлж, хамтран ажиллахаа илэрхийлжээ.

Эх сурвалж: Montsame.mn