Сургуулийн өмнөх боловсролын салбарын 2025-2026 оны хичээлийн жилийн зорилго, хөтөлбөрийн хэрэгжилтийн үр дүн, сайн туршлага болон ирэх хичээлийн жилд анхаарах асуудлуудыг хэлэлцлээ.

“Сугалаагүй цэцэрлэг” санаачилгын хүрээнд цэцэрлэгийн насны хүүхдүүдийг хамран сургах тойргийн дагуу бүрэн хамруулах зорилт амжилттай хэрэгжүүлж байна. 2025-2026 оны хичээлийн жилд улсын хэмжээнд сургуулийн өмнөх боловсролын 1399 байгууллагад 258.849 хүүхэд хамрагдаж байгаа нь нийт хамран сургалтын насны хүүхдийн 93 хувийг эзэлж байна. Энэ үзүүлэлт нь өмнөх оныхоос 2.4 хувиар өссөн бөгөөд 5 настай хүүхдийн хамран сургалт 96 хувьд хүрч, 1.9 хувиар нэмэгджээ.

Сургуулийн өмнөх боловсролын салбарт “Хүүхэд бүрд тэгш боломж”, “Чанартай боловсрол” гэсэн хоёр үндсэн чиглэлийг баримтлан бодлогын шинэчлэлүүдийг хэрэгжүүлсэн байна. Цаашид шинэчилсэн сургалтын хөтөлбөрийн хүрээнд бэлтгэл бүлгийг төгсөж сургуульд элсэж буй хүүхдүүдийг зөвхөн уншиж, бичиж сурсан байхаас илүүтэй өөртөө итгэлтэй, хамтран ажиллах чадвартай, өөрийгөө чөлөөтэй илэрхийлэх хэл ярианы суурь чадвартай болгон төлөвшүүлэхэд анхаарах юм.

Мөн хүүхдийг бие бялдар, оюун ухаан, сэтгэл зүйн хувьд эрүүл, зөв хөгжүүлэх зорилготой хөтөлбөрүүдийг уялдуулан хэрэгжүүлэхээр төлөвлөжээ. Сургуулийн өмнөх боловсролын багш нарын ажлын ачааллыг бууруулж, хүүхэдтэй ажиллах цаг хугацаа, боломжийг нэмэгдүүлэх аж.

Түүнчлэн хүүхдийн хөгжлийн ажиглалт, үнэлгээний үйл ажиллагааг цахимжуулж, хиймэл оюунд суурилсан системийг үе шаттай нэвтрүүлэхээр төлөвлөж байна. Цэцэрлэгүүдэд сургалтын хөтөлбөр хэрэгжүүлэхэд шаардлагатай тоглоом, наадгай, СТЭМ чиглэлийн хэрэглэгдэхүүний хангамжийг сайжруулж, хөрөнгө оруулалтыг үе шаттай нэмэгдүүлэх талаар Боловсролын яамнаас мэдээлэв.

Эх сурвалж: Montsame.mn