Сонгомол болон чөлөөт бөхийн дэлхийн чансааны оноо олгох “Улаанбаатар опен-2026” тэмцээн “Буянт-Ухаа” спортын ордонд өнөөдөр эхэллээ.
Тус тэмцээнд 23 орны 300 тамирчин 30 алтан медалийн төлөө хүч сорьж байгаа бөгөөд нийт тамирчдын 198 нь эрэгтэй, 99 эмэгтэй аж. Манай улсад ирсэн тамирчдын олимпын наадам, ДАШТ, тивийн АШТ-ий медальтай тамирчид цөөнгүй оролцож байна. Тухайлбал, дэлхийн хошой аварга, “Парис-2024” олимпын наадмын мөнгөн медальт Рахман Амузадхалили, “Парис-2024” олимпын наадмын аварга Магомед Рамазанов, 2025 оны дэлхийн аварга Хан Чон Сон, 2024 оны дэлхийн аварга Моэ Киёока, 2026 он гарснаас хойш нэг ч ялагдаа яваа Ази тивийн аварга Сужеет тэргүүтэн Монголын дэвжээнд өрсөлдөж байна. Энэтхэгийн шигшээ багийнхан хамгийн өргөн бүрэлдэхүүн буюу 45 тамирчнаа уг тэмцээнд сойж байна.
Өнөөдөр сонгомол бөхийн долоон жингийн медальтнууд тодорно. Харин маргааш сонгомолын үлдсэн гурван жин болон чөлөөт бөхийн эмэгтэйчүүдийн 50, 53, 57, 59, 72 кг-ын жингийн барилдаан болно. Тэгвэл бямба гарагт эмэгтэйчүүдийн 55, 62, 65, 68, 76 кг, эрэгтэйчүүдийн 74, 86, 92 кг-ын жингийн барилдааны аваргууд тодрох юм. Тэмцээний сүүлийн өдөр буюу ням гарагт эрэгтэйчүүдийн 57, 61, 65, 70, 79, 97, 125 кг-ын жингийн барилдаан болсноор “Улаанбаатар опен” өндөрлөх хуваарьтай байна.
Тэмцээнийг МҮОНТВ-ээр дөрвөн өдрийн турш шууд дамжуулан үзүүлж байгаа ажээ.
Эх сурвалж: Montsame.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!