Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Бүгд Найрамдах Энэтхэг Улсаас Монгол Улсад суугаа Онц бөгөөд Бүрэн эрхт Элчин сайд Атул Малхари Готсурветэй уулзлаа.
Монгол Улс, Бүгд Найрамдах Энэтхэг Улс нь 1955 оны 12 дугаар сарын 24-ний өдөр дипломат харилцаа тогтоосноос хойш хамтын ажиллагааг тууштай хөгжүүлж ирсэн бөгөөд 2009 онд Иж бүрэн түншлэл, 2015 онд Стратегийн түншлэлийн харилцаа тогтоосон билээ.
Энэтхэгийн Засгийн газрын дэмжлэгтэйгээр нийслэлд боловсролын салбарт дараах төслүүдийг хэрэгжүүлж байна. Тухайлбал,
- Монгол, Энэтхэгийн Засгийн газар хооронд байгуулсан хамтын ажиллагааны санамж бичгийн хүрээнд хэрэгжиж буй Энэтхэг–Монголын Найрамдлын ерөнхий боловсролын сургууль,
- Шинжлэх ухаан, технологийн их сургуулийн дэргэд байгуулагдаж буй Атал Бихари Важпайн нэрэмжит Мэдээлэл, харилцаа холбооны технологийн төвийн төсөл хэрэгжиж байна.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Бүгд Найрамдах Энэтхэг Улс Монгол Улс, Улаанбаатар хоттой олон салбарт хамтран ажиллаж байгаад талархал илэрхийлж, нийслэлд хэрэгжиж буй сургууль болон, технологийн төвийг хурдан хугацаанд ашиглалтад оруулахад нийслэлээс шаардлагатай арга хэмжээг авч, дэмжиж ажиллахаа илэрхийлэв. Мөн Нийслэлийн Засаг даргын Тамгын газар болон Бүгд Найрамдах Энэтхэг Улсын Элчин сайдын яам хоорондын ажил хэрэгч, найрсаг харилцаа улам бэхжиж, Монгол, Энэтхэгийн стратегийн түншлэлийн харилцааг нийслэл хотын түвшинд дэмжин хөгжүүлэхэд харилцан нягт хамтран ажиллана гэдгээ илэрхийллээ.
Эх сурвалж: ulaanbaatar.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!