Нүүрсний экспорт, тээвэрлэлтийн талаарх ерөнхий хяналтын сонсголыг өнөөдөр хийж байгаа билээ. Нээлттэй сонсголд Засгийн газар, УИХ-ын гишүүд болон Эрдэнэс Тавантолгой, Монголын төмөр зам, Гаалийн ерөнхий газар гэх мэт холбогдох албаныхнаас гадна иргэдийн төлөөлөл оролцож байна.
Сонсголыг дөрвөн танхимд хувааж хийхээр бэлтгэл ажлыг хангасан боловч иргэд эсэргүүцэж, дөрвөн танхимд биш Их танхимд бөөнөөрөө сууж байгаад асуудлаа ярих шаардлагыг тавив. Үүнтэй холбоотойгоор УИХ-ын нүүрсний асуудлаар зохион байгуулах нээлттэй сонголыг 13.00 цаг хүртэл хойшлууллаа.
Мөн нээлттэй сонсголыг хийлгэхгүй байх, зохион байгуулалттай бусниулах гэсэн оролдлогууд мэр сэр харагдаж, нэлээд бужигнаан, эмх замраагүй байдал үүссэн учраас хоёр цагаар Төрийн ордны их танхимд нээлттэй сонголыг үргэлжлүүлэхээр боллоо.
Сонсгол явуулах сэдэв:
- “Эрдэнэс Тавантолгой” ХК-ийн үйл ажиллагааны хүрээнд өнөөг хүртэл төлбөрийг ашигт малтмал, түүхий эдээр төлөх нөхцөлтэй /Оффтейк/ болон төлбөрийг урьдчилан авч ашигласан гэрээнүүдийн талаар;
- Нүүрсний асуудлаар 2013 оноос хойш шийдвэрлэгдсэн, хэрэгсэхгүй болсон хэргүүдийн талаарх мэдээлэл болон шалгагдаж байгаа хэргүүдийн явц, шийдвэрлэлтийн байдлын талаарх мэдээлэл;
- Монгол Улсаас 2020-2022 онуудад нийт хэдэн боомтоор, ямар хэмжээний нүүрс гаргасан, хэдэн аж ахуйн нэгж ямар хэмжээгээр олборлож, ямар аж ахуйн нэгж тээвэрлэж, хэдий хэмжээний орлого олсон, коксжих нүүрсний дэлхийн болон БНХАУ-ын зах зээл дээрх үнэ, хилийн үнэ, уурхайн аман дээр борлуулж буй үнийн зөрүү, түүний шалтгаан. Энэхүү үнийн зөрүү нь хоёр улсын тодорхой этгээдүүдийн авлига, хууль бус үйл ажиллагааны орлого, татвараас зайлсхийхэд нөлөөлсөн эсэх;
- “Эрдэнэс Тавантолгой” ХК-ийн зүгээс Тавантолгой-Зүүнбаян, Тавантолгой-Гашуунсухайт чиглэлийн төмөр замын бүтээн байгуулалтын төслүүдэд ямар хэлбэрээр, хэдий хэмжээний санхүүжилт гарган оролцсон болон эдгээр төмөр замуудын 1 км тутмыг ямар өртгөөр барьж байгуулсан тухай.
“Монгол Улсын Төрийн ордны хамгаалалт, үйлчилгээний журам”-д заасны дагуу сонсголд оролцогчдыг иргэний үнэмлэхийг үндэслэн албаны болон үндэсний хувцастай Төрийн ордонд нэвтрүүлнэ.
